Gauksstaðir

Breytingar

2009-09-27T11:31:00.002Z

Miklar breytingar hafa verið á okkar högum undanfarið, eins og hjá svo mörgum öðrum. Við erum flutt frá Gauksstöðum og í borgina aftur. Fljótlega munum við skýra betur frá því sem á daga okkar hefur drifið og hefja vonandi aftur reglulegt blog.

Dönsum eins og enginn sé að horfa

2009-02-19T23:31:00.002Z

Sæl verið þið, það er orðið ansi langt síðan ég hef skrifað eitthvað hérna inn. Núna langar mig að setja hérna inn texta sem mér finnst áhugaverður og minna okkur á að það er enginn tími betri en einmitt núna til að vera hamingjusamur.

Ég var að fara í gegnum dótið mitt hérna úr geymslunni og fann þennan texta sem ég prentaði út þann 20. desember árið 2000. Þessi texti birtist á þeim tíma á visir.is undir einhverju sem ber nafnið Spegillinn. Ég veit ekki hver er höfundurinn að þessum texta en ég tek mér það bessaleyfi að birta hann hérna í von um að enginn verði sár yfir því. Ef höfundur er þekktur þá endilega látið nafn hans koma fram í athugasemdunum – orð í belg hérna fyrir neðan. Hér kemur textinn:

Dönsum eins og enginn sé að horfa
Við sannfærum okkur sjálf um að lífið verði betra eftir að við giftum okkur, eignumst börn og síðan annað barn. Síðan pirrum við okkur á því að krakkarnir verði nógu gamlir og við erum sannfærð um að við verðum betur stödd þegar að því kemur.

Næst erum við örg yfir því að við þurfum að eiga unglinga. Við munum svo sannarlega verða hamingjusöm þegar því skeiði verður lokið. Við teljum sjálfum okkur trú um að líf okkar verði fullkomið þegar maki okkar tekur til í sínum málum, þegar við fáum betri bíl, þegar við fáum tækifæri til að fara í gott frí eða þegar við setjumst í helgan stein.

Sannleikurinn er sá að það er ekki og verður aldrei til betri tími til að vera hamingjusamur en einmitt núna. Ef ekki núna, hvenær þá. Lífið verður alltaf fullt af áskorunum og viðfangsefnum. Það er best að viðurkenna þetta fyrir sjálfum okkur og ákveða að vera hamingjusöm engu að síður, á hverjum degi.

Vinur minn sagði eitt sinn: Í langan tíma hafði mér virst sem líf mitt væri í þann mund að hefjast - hið raunverulega líf. En alltaf var einhver hindrun í veginum, eitthvað sem þurfti að eignast fyrst, einhver óútkljáð mál, mig vantaði tíma til að sinna hlutunum og alltaf voru einhverjar ógreiddar skuldir. Þá loks gæti ég byrjað að lifa lífinu. Að lokum rann upp fyrir mér ljós. Þessar "hindranir" eru líf mitt. Þetta sjónarhorn hjálpar okkur að sjá að það er engin leið til að hamingjunni. Hamingjan er leiðin.

Svo að varðveittu og lærðu að meta hvert augnablik sem þú átt. Lærðu að meta það meira vegna þess að þú deildir því með einhverjum sérstökum, nógu sérstökum til að eyða tíma þínum með... og mundu að tíminn bíður ekki eftir neinum!

Hættu að bíða 
Hættu að bíða, bíða eftir að þú klárir þetta eða hitt, eftir að þú missir nokkur kíló, eftir að þú náir á þig nokkrum kílóum, hættu að bíða eftir að þú eignist börn og barnabörn og eftir að börnin flytji að heiman, eftir að þú byrjir að vinna, að þú hættir að vinna, að þú giftist, að þú skiljir, eftir laugardagskvöldinu eða sunnudagsmorgninum, hættu að bíða eftir nýja bílnum, eftir að þú sért búinn  að borga upp bílinn eða húsið, eftir vorinu, sumrinu, haustinu, vertinum. Hættu að bíða eftir því að þú fáir þér drykk og svo að bíða eftir því að það renni af þér. Hættu að bíða eftir því að þú deyir...  Hættu að bíða eftir að ákveða að, Það er enginn tími betri en einmitt núna, til að vera hamingjusamur...

Hamingjan er ferðalag, ekki áfangastaður 
Í dag er tími til að; vinna eins og þú þurfir ekki á peningum að halda, elska eins og enginn hafi nokkurn tíma sært þig, dansa eins og enginn sé að horfa...

Kv. Ág.

Gamla brýnið ennþá góður

2009-02-18T17:38:00.000Z

Morrissey - I'm Throwing My Arms Around Paris

...og já, gleðilegt nýtt ár öll sömun

2009-01-25T13:53:00.001Z

Allt gott á Gauksstöðum

2009-01-25T13:38:00.003Z

Jæja, við erum ekki hætt að blogga ef þið haldið það. Málið er bara að þetta átti upphaflega að vera blogg á jákvæðu nótunum. Ekkert vol eða væl heldur frekar svona uppbyggilegar vangaveltur um lífið og tilveruna ásamt því að vera dagbók fjölskyldunnar hérna við sjóinn. Kannski var það líka megintilgangurinn. Í ljósi undanfarinna atburða í þjóðfélaginu hefur maður ekki haft lyst á því að setja fingur á lyklaborð, verið hræddur um að gremjan og reiðin sem hefur reglulega skotið upp kollinum hjá manni myndi leyta í bloggið og það er ekki það sem við viljum. Ekki á þessu bloggi allavega. En lífið heldur áfram og eftir að hafa stillt sig af og velt vöngum heldur maður áfram hérna á síðum vefsins víðfema.

Munið bara að brosa framaní heiminn þá brosir heimurinn framaní þeeeeeeeiiiiiiiiiggggg.

P.S. Tek það fram að ég þoli ekki Pollýönnu.

Náttúruöflin geta verið ógnandi

2008-12-12T08:25:00.005Z

Náttúruöflin minntu á sig hérna hjá okkur í Garðinum í gærkvöldi og veðrið varð hundleiðinlegt eins og víðar. Mestu vindhviður kvöldsins voru um 36.9 m/sek samkvæmt sjálfvirkum mæli á Garðskagavita. Veðrið gekk þó fljótt yfir sem betur fer. Þegar veðrið stóð sem hæst í gærkvöldi þá fengum við símtal frá nágrannakonunni okkar á Vörum þar sem hún varaði við því að vera við suðurgluggana í húsinu. Þakið á hesthúsinu þeirra hafði fokið, plötur voru að fjúka og björgunarsveitin var að störfum. Ari fór hérna út hjá okkur og allt virtist vera í lagi hjá okkur, það kemur samt allt betur í ljós þegar birtir. Það er svo lítil lýsing hérna niður við sjóinn hjá okkur. Kv. Ág.

Opnar vinnustofur við Gauksstaðaveg

2008-12-11T21:18:00.004Z

Ég vil bara minna ykkur á að við erum með opna vinnustofu hérna hjá okkur á Gauksstöðum í Garði næstu tvær helgar fram að jólum frá kl. 13:00 til 18:00. Endilega kíkið við hjá okkur og nágranna okkar honum Reyni Katrínarsyni en hann hefur einnig opnað vinnustofu sína fyrir gestum og gangandi næstu helgar fram að jólum á sama tíma og við. Á vef Víkurfrétta má sjá smá umfjöllun um þessar opnanir. Kv. Ág.

Kærleiksvika

2008-12-09T09:24:00.003Z

Þessa vikuna er kærleiksvika á leikskólanum Gefnarborg. Þá er kærleikanum sérstaklega veitt athygli. Þetta eru alltaf yndislegar vikur á leikskólanum, þessar þemavikur. Það mætti alveg vera svona kærleiksvika í hinu almenna dagatali þar sem við íslendingar allir hugsuðum sérstaklega um kærleikann og sýndum hann í verki. Þá er kannski ágætt núna að spyrja sig aðeins „hvað er kærleikur“? Kv. Ág.

Hvað er kærleikur ?

Kærleikur er, hvert góðverk sem þú vinnur.

Kærleikur, er hvert bros sem þú gefur.

Kærleikur, er að faðma þann sem grætur.

Kærleikur, er að hugga þann sem syrgir.

Kærleikur, er að gefa þeim sem þarfnast.

Kærleikur, er umhyggja fyrir öllu sem lifir.

Kærleikur, er að biðja fyrir öllum, góðum sem slæmum.

Kærleikur, er að lifa sáttur við sjálfan sig og aðra.

Kærleikur, er að dæma ekki.

Kærleikur, er ljósið sem býr í hjarta þínu.

Opin vinnustofa á Gauksstöðum

2008-12-07T08:56:00.004Z

Allar helgar fram að jólum verða við með opið hús á vinnustofunni okkar hérna á Gauksstöðum í Garði. Þar er hægt er að koma og sjá hvað við erum að vinna að ásamt því að þar verða til sölu ýmsir munir og vörur sem við höfum hannað og framleitt. Þær vörur sem við bjóðum upp á eru m.a.: Hnefatafl, íslensk rúnaspil, trérúnir í poka, ýmsir verndargripir úr timbri og málmi, spil og gestaþrautir, gripir mótaðir í eldi og hin sívinsælu jólaeplakerti og steinakerti ásamt ýmsum gjafaöskjum.

Við höfum lengi verið heilluð af arfleifð okkar íslendinga, náttúrinni sjálfri og því sem hún gefur af sér. Þetta nýtum við okkur í að gera nýja hluti sem byggja á þessum gamla grunni eins og rúnunum. Um að gera að kíkja við og sjá hvað við erum að gera núna í aðventunni. Einnig er Reynir Katrínarson með sína vinnustofu hérna að Gauksstaðavegi 2 opna á sama tíma fram að jólum.

Opið laugardaga og sunnudaga milli kl. 13:00 og 18:00.

Í dag 7. des verður einnig jólamarkaður hérna í Samkomuhúsinu í Garði frá 15:00 til 17:00. Þar verður fluttur söngur og fleira milli 16:00 og 17:00. Síðan verður kveikt á jólatrénu í Garðinum kl. 17:00.

Njótið dagsins :-)

María Elísa er 4 ára í dag :-)

2008-12-07T08:48:00.003Z

Elsku María okkar til hamingju með daginn í dag. Tíminn líður ferlega hratt og ég veit þú verður orðin fullorðin áður en maður veit af... alla vegana var það þannig með stóru systurnar þínar... það er svo stutt síðan þær voru 4 ára :-).

Njóttu dagsins, kv. litla fjölskyldan þín hérna á Gauksstöðum.

Þau fylla sko hjarta manns líka af hamingju

2008-12-05T23:40:00.003Z

Í froststyllu og veðurblíðu

2008-12-05T23:10:00.002Z

Veðrið í dag var alveg yndislegt, svona veður þar sem maður fer allar sínar ferðir gangandi. Það er búið að vera kalt, bjart, fallegt og alveg stillt veður. Morgunhimininn var æðislegur... langaði hreinlega að fara út og anda honum að mér... ef þið vitið hvað ég meina :-). Það var eitthvað svo ferskt loftið og þægilegt að anda því að sér... svo nærandi þegar við gengum hérna heim að húsinu í dag... Gauksstaðir, nánasta umhverfið, útsýnið yfir sjóinn og á allan fjallahringinn er svo fallegt á svona dögum. Ég vildi að veturnir væru alltaf svona... þetta minnti mig svolítið á það hvernig veðrið er oft á Akureyri nema auðvitað að það er enginn snjór hérna hjá okkur.

Á svona degi fyllist hjarta manns af hamingju :-) Kv. Ág.

Lífið á Gauksstöðum þessa dagana

2008-12-03T23:37:00.002Z

Lífið hér á Gauksstöðum gengur sinn vanagang. Svavar og María braggast bara vel. Svavar byrjaði í 1. bekk núna í haust og námið gengur bara vel. Honum finnst skólinn skemmtilegur og það er aldrei vandamál að fara í skólann á morgnana. Eins gengur heimanámið vel, farinn að geta lesið töluvert og hann hefur gaman af því að auki. Duglegur drengur hann Svavar okkar. Hann er auðvitað orðinn töluvert stór og talar stundum þannig til Maríu „æji hún er svolítið lítil, er það ekki“ eða „þú mátt það þegar þú verður stór“. Hann ætlar auðvitað ekki að vera leiðinlegur en Maríu finnst þetta svolítið svekkjandi. Hún reynir hvað hún getur að sýnast stór þessa dagana, hún þykist meira að segja vera að lesa eins og hann þegar hann er að læra… þá hreyfir hún munninn eins og hún sé að lesa… ha ha hún er svo mikið krútt þessi elska :-).

María er búin að vera lasin, með flensu, síðan á föstudaginn síðasta. Henni finnst ekkert gaman að hanga svona inni allan daginn og vill helst fara í leikskólann hið fyrsta. Hún var hitalaus í dag þannig þetta er alveg að koma hjá henni. Vonum bara að fleiri verði ekki lasnir í framhaldinu. Nú styttist í að daman verði fjögurra ára en það verður á sunnudaginn kemur. Hana hlakkar mikið til.

Þessa dagana erum við á fullu að framleiða vörurnar okkar og undirbúa það að opna vinnustofuna okkar fyrir gestum og gangandi næstu helgar fram að jólum, þ.e. laugardaga og sunnudaga frá 13 – 18. Þar getur fólk kíkt á okkur og séð hvað við erum að vinna að ásamt því að versla af okkur jólagjafirnar ;-). Ég hvet ykkur kæru lesendur til að kíkja á okkur ef þið hafið tækifæri til þess.

Nú styttist óðum í jólin, aðeins rúmir 20 dagar til jóla. Tíminn hefur liðið alltof hratt eitthvað… ekki veit ég afhverju hann er að flýta sér þetta. Ég hef einhvernveginn ekki alveg gefið mig á vald jólastemmningunni en þetta kemur smá saman. Við erum búin að skreyta töluvert en ljósin eru samt ekki komin upp utandyra, það verður vonandi gert í næstu viku. Mér finnst alveg yndislegt að lýsa skammdegið upp með jólaljósunum :-).

Vonandi tekst mér að skrifa eitthvað meira hér inn áður en jólin ganga í garð. Þangað til, eigið góðar stundir og njótið samvista við hvert annað :-). Kv. Ág.

Ég vakna þennan morgun og vel að hann sé góður

2008-12-03T10:39:00.002Z

Ég fékk í morgun sent þetta fallega ljóð frá alveg yndislegri manneskju. Textanum fylgdi að höfundur væri óþekktur. Ég grúskaði aðeins og komst að því að ljóðið er eftir skáldkonuna Unni Sólrúnu sem hefur ort margt fagurt um lífið og tilveruna og birt á heimasíðu sinni. Mig langar að leyfa ykkur að njóta þessa með mér :-)

Ég vakna þennan morgun og vel að hann sé góður
vel að hann sé yndislegur, myrkur og hljóður
ég vel að kúra um stund og staðnæmast við það
hve stórkostlegt sé lífið ef fátt amar að.

Ég ákveð því að velja að vandamálin fá
vistuð séu hjá mér til þess eins að ljá
tilverunni ennþá fleiri tilbrigði og fleti
ég tek þeim opnum örmum svo nýtt mér þau ég geti.

Og eftir litla stund ég vel að fara á fætur
faðma þennan morgun og allar hans rætur
hita mér gott kaffi af kærleik þess ég nýt
kex smyr með osti í blöðin svo ég lít.

Að endingu ég segi við þig sem þetta lest
þetta er góður dagur, hafðu það sem best
ég óska þess að hugsanir fallegar þig finni
ég faðmlag þér sendi og kveð þig að sinni.

Umhugsunarefni á þessum tímum

2008-11-15T23:16:00.002Z

Árið 2006 setti ég hér inn speki sem ég rakst á og mér fannst nokkuð góð. Ég ætla að setja hana hér aftur inn því að hún á vel við nú sem aldrei fyrr.

Kvöld eitt sagði gamall Cherokee indíáni sonarsyni sínum sögu um baráttu sem á sér stað innra með fólki. Hann sagði, „Drengur minn, baráttan er á milli tveggja úlfa sem búa í okkur öllum. Annar er illur. Hann er reiði, öfund, afbrýðisemi, sorg, eftirsjá, græðgi, hroki, sjálfsvorkun, sektarkennd, gremja, vanmáttarkennd, lygar, dramb, mikilmennska og eigingirni. Hinn úlfurinn er góður. Hann er gleði, friður, ást, von, friðsæld, auðmýkt, góðmennska, velgjörð, samúð, örlæti, sannindi, meðaumkun og trú.“ Drengurinn hugsaði um þetta um stund og spurði svo afa sinn: „Hvor úlfanna vinnur?“ Gamli indíáninn svaraði að bragði, „Sá þeirra sem þú fóðrar.“

Smá hugleiðing

2008-11-08T09:17:00.002Z

Jæja þá er helgin komin. Vikurnar og mánuðirnir líða hver af öðrum án þess maður fái við því spornað... það fer bara að styttast í jólin meira að segja, sem voru svo fjarlæg fyrir svo stuttu að mér finnst. Undanfarnar vikur hafa líka verið sem rússíbani fyrir flest okkur sem búum hér á skerinu. Margir í kringum okkur eiga erfitt núna, hafa jafnvel misst vinnuna svo eitthvað sé nefnt. Þess óskar enginn sér. Það að missa vinnuna þýðir einfaldlega að ekki næst að standa við þær skuldbindingar sem búið er að stofna til.

Á þessum tímum leitum við inn á við og skoðum hvað það er sem skiptir okkur virkilega máli. Það að staldra aðeins við og hugleiða þessa hluti er öllum manni hollt... hægja aðeins á... líta sér nær... hugsa hvort ekki sé hægt að rétta þeim hjálparhönd sem eiga erfitt núna. Það þarf jafnvel ekki meira en segja þeim hve mikils virði þeir eru manni, sýna þeim ást og væntumþykju sem standa manni næst, brosa jafnvel til ókunnugra og smita heiminn af brosi :-).

Ég held að þetta ástand sem nú varir verði til þess að við bæði sem þjóð og einstaklingar hugsum okkar gang og skoðum það vel hvað það er sem skipti okkur mestu máli. Hvernig þjóðfélagi viljum við búa í? Ég held að nú komi loksins tími nýrra gilda og það er löngu kominn tími á ný gildi í þessu blessaða þjóðfélagi okkar. Hvernig væri að innleiða aftur traust, sanna vináttu, virðingu til handa öðrum, okkur sjálfum og umhverfinu okkar? Góðu gildin s.s. gleði, vinátta og hjálpsemi hafa lútið lægra haldi undanfarin ár fyrir peningahyggjunni. Það þarf bara hver að rækta sinn garð þá kemur þetta :-).

Það hefur löngum verið sagt að ekki væri byggilegt þetta langt norður í íshafi ef ekki væri fyrir tilstuðlan hlýrri hafstrauma. Nokkrir kunningjar hafa rætt það að flytja bara erlendis, jafnvel til Kanada eða til hinna Norðurlandanna. Ég held við Íslendingar verðum bara að standa þetta af okkur og rísa úr hafi á ný... við höfum alla burði til þess þegar frá líður og þessi flóðbylgja sem nú skellur á okkur fjarar út. Í fyrstu verður erfitt að halda sér á floti síðan lærum við að komast af og synda í þá átt sem við viljum fara... það þýðir samt ekki að treysta á og bíða aðgerðarlaus eftir því að einhver annar bjargi okkur... við verðum sjálf að halda okkur á floti. Eins og ég nefndi áðan þá er kominn tími á ný og betri gildi en hafa ríkt í okkar sjúka þjóðfelagi undanfarin ár... „nýja“ Ísland verður að standa á traustum grunni og þennan grunn þurfum við að byggja saman núna. Þó nú séu erfiðir tímar þá verðum við bara að reyna að vera jákvæð og hlúa að því sem okkur er kærast :-).

Eins og mörg ykkar vita þá er bros meira smitandi en kvef eða flensa þannig alli saman nú... BROSA! Kv.Ág.

Vatnavinir

2008-11-07T21:19:00.003Z

Ég vil af gamni benda ykkur á spennandi verkefni sem mágkona mín hún Olga er að vinna að ásamt öðru góðu fólki þessar vikurnar. Hún er í hópnum Vatnavinir sem vinna að hugmyndum um uppbyggingu á heilsutengdum ferðamannaiðnaði á Íslandi. Kv. Ág.

Afmæliskveðja

2008-11-03T10:59:00.002Z

Elsku Hera okkar, til hamingju með afmælið sem var á laugardaginn. Það hefði verið gaman að geta eytt deginum meira með þér. Það var samt gaman að hitta þig aðeins og fá að knúsa þig :-). Í síðustu færslu nefndi ég fegurð og það geri ég einnig núna :-) því ég er svo stollt af því hve fallegar og góðar stóru stelpurnar mínar eru en Birna er orðin 18 ára og Hera varð 17 ára núna þann 1. Þið eruð yndislegar! Kv.Ág.

Er fegurðin mælanleg?

2008-11-03T10:07:00.004Z

Ég sá litla frétt sem birtist á forsíði Morgunblaðsins föstudaginn síðasta. Þar segir að samkvæmt nýrri rannsókn tveggja vísindamanna við St Andrewsháskóla þá erfi karlar ekki fegurð feðra sinna. Ég veit ekki hvort fréttin er illa þýdd eða hvort þetta sé meiningin. Mig langar að vita hvaða útgangspunktur á fegurð er notuð í þessari rannsókn. Hver er hin raunverulega fegurð? Getur einhver sagt mér það? Er fegurðin mælanleg? Það er kannski hægt að gera rannsókn um útlit og andlitsdrætti en ég tel það vera fjarstæðu að hægt sé að gera rannsóknir á fegurð því fegurðin er afstæð.

Ég hef kynnst fólki sem virkar „fagurt“ við fyrstu sýn en fljótt hverfur þessi tilfinning þegar maður fer að kynnast viðkomandi manneskju og á sama hátt hittir maður manneskju sem ekki er talin neitt rosalega myndarleg en vex þvílíkt og getur orðið ein fallegasta og besta manneskja sem maður hefur hitt. Kv.Ág.

Yndisleg helgi

2008-10-26T22:19:00.003Z

Nú er þessi blessaður sunnudagur eða „knúsdagurinn mikli“, eins og við höfum útnemmt alla sunnudaga hér á Gauksstöðum, kominn að kveldi og ný vika framundan. Dagurinn í dag byrjaði auðvitað með miklu knúsi og hélt síðan áfram í rólegheitum frameftir öllum degi... ahhh það er svo notalegt að slappa svona af :-). Sonja frænka kíkti til okkar ásamt Örvari og Selmu. Það var mjög gaman að fá þau í heimsókn og léku frændsystkinin sér mjög vel saman. María fór strax að spyrja hvort Selma mætti ekki koma aftur í heimsókn á morgun og Örvar líka. Elsku Sonja takk fyrir innlitið... alltaf gaman að fá góða gesti í sveitina.

Birna og Hera fengu síðan far í bæinn með Sonju en þær eru búnar að vera hjá okkur alla helgina frá því við sóttum þær inn í R.vík seinnipartinn á föstudag. Svavar og María eru ekkert smá ánægð þegar stóru systurnar koma og gista. Þær líka dekra við litlu systkinin sín. Takk fyrir helgina stelpur... sjáumst vonandi sem fyrst aftur :-).

Síðasta vika einkenndist af ákveðnu spennufalli eftir alla vinnuna og stressið undanfarið. Við Ari erum bara orðin verulega þreytt eitthvað og því ákváðum við að taka okkur vetrarfrí í kringum helgina þar sem það var frí í skólanum hans Svavars bæði á föstudaginn var og svo er aftur frí á morgun. Maríu var að sjálfsögðu líka gefið frí. Ferlega notalegt að slaka svona á yfir langa og góða helgi.

Vonandi hefur helgin verið ykkur ánægjuleg líka :-) Kv. Ág.

Myndablogg: SÓL FRÁ GAUKSSTÖÐUM

2008-10-26T22:15:00.003Z

Náttúruöflin segja til sín enn á ný

2008-10-24T11:15:00.005Z

Veðrið var slæmt hérna í gærkvöldi og í nótt eins og víðar á landinu. Þessu fylgdi þó engin snjókoma hjá okkur eins og var búið að spá. Veðrið náði hámarki um kl. 1 í nótt en þá var hérna VNV 24.9 m/sek og fóru vindhviðurnar í rúmar 33 m/sek. Núna um kl. 11 í morgun var vindurinn farinn að ganga niður og var kominn í NV 10.4 m/sek. Þegar þetta byrjaði í gærkvöldi og maður sá að búið var að kalla út hjálparsveitina og þeir komnir á vakt í næsta húsi þá viðurkenni ég það alveg að það kom svolítill kvíði í mig... mér varð hugsað til síðasta vetrar með öllu því sem þá gekk á. Vindáttin var okkur samt hagstæð þar sem hún var ekki beint af hafi heldur úr norðvestri.

Það gekk samt ýmislegt á hérna í Garðinum; Binda þurfti niður þak í nágrenninu, fergja plötur, trampolín o.fl. sem fólk hafði ekki haft sinnu á að ganga frá áður en veðrið gekk yfir. Maður er nú búinn að læra það að það borgar sig nú að koma öllu lausu í hús s.s. sorptunnum o.fl. þegar búist er við stormi hérna því veðrin geta orðið nokkuð ýkt á þessu svæði og þar sem við erum ekki í skjóli frá neinum heldur stöndum hér ein niður við sjóinn þá þurfum við bara að mæta náttúruöflunum.

Allt er í góðu hér hjá okkur og sluppum við við tjón í þessum stormi fyrir utan það að þakpappinn á barnahúsinu er byrjaður að tætast af og það þarf að laga hið fyrsta. Kv. Ág.

Á sama stað og fyrir ár síðan

2008-10-05T00:37:00.003Z

Fyrir um tæpu ári síðan eða þann 28. Okt.2007 þá skrifaði ég hér blogg þar sem fyrirsögnin var „ Hvað er það sem skiptir okkur máli?“ Þegar ég les yfir þessa færslu sé ég að við erum í svipaðri stöðu og þá. Er það þetta sem við viljum? Árið í ár er búið að vera erfitt, mikil vinna, mikið af verkefnum en samt er maður ekki að sinna nógu vel því sem skiptir mann mestu máli eða hvað?

Á hverju ári birti ég hérna texta sem ég fékk sendann frá góðri vinkonu minni fyrir um 8 árum. Mér finnst gott að taka þennan texta annaðslagið upp og skoða. Því maður þarf að einbeita sér vel og gleyma sér ekki í brjálæðinu eins og oft vill verða. Hér kemur hann að vísu á ensku:

S L O W D A N C E 
Have you ever watched kids
on a merry-go-round
Or listened to the rain
slapping on the ground?

Ever followed a butterfly's
erratic flight
Or gazed at the sun into
the fading night?

You better slow down
Don't dance so fast
Time is short
The music won't last

Do you run through each day
on the fly
When you ask "How are you?"
do you hear the reply?

When the day is done,
do you lie in your bed
With the next hundred chores
running through your head?

You'd better slow down
Don't dance so fast
Time is short
The music won't last

Ever told your child,
We'll do it tomorrow
And in your haste,
not see his sorrow?

Ever lost touch,
Let a good friendship die
'Cause you never had time
to call and say "Hi"?

You'd better slow down
Don't dance so fast
Time is short
The music won't last

When you run so fast
to get somewhere
You miss half the fun
of getting there.

When you worry and hurry
through your day,
It is like an unopened gift....
Thrown away...

Life is not a race.
Do take it slower
Hear the music
Before the song is over.

Kv. Ág. 

Góður laugardagur í faðmi vina

2008-10-04T23:58:00.001Z

Í dag fórum við inn í Reykjavík og kíktum á Þórarinn bróður og fjölskyldu. Þar sem Þórarinn bróðir átti afmæli í gær bakaði Olga köku í dag og sló upp veislu… nammi namm. Krakkarnir áttu góða stund saman þó sérstaklega stelpurnar sem léku sér saman út í eitt. Gaman að fylgjast með þeim frænkum. Það kæmi manni ekki á óvart þó seinna meir stofnuðu þær hljómsveit saman. Þá munum við að þær byrjuðu að æfa árið 2008 :-). Þórarinn og Olga buðu okkur einnig í mat sem var mjög góður. Alltaf gaman að sækja þau heim. Takk kærlega fyrir okkur! Kv. Ág.

Vindasamt á Íslandi

2008-10-04T23:56:00.002Z

Fyrsti snjórinn kom í ár þann 2.október. Í fyrstu lítil föl sem varla festist og að lokum dálítiið „teppi“ um kvöldið. Ekki mikill snjór að vísu hér við sjóinn… örlítið meiri inni í Reykjavík :-). Ferðin með Maríu í leikskólann gekk frekar hægt þennan morguninn þar sem við gengum í rólegheitum þurfti hún að stoppa að mér fannst við hvert fótmál til að skoða og þreyfa á snjónum. Bæði Svavar og María voru mjög ánægð með snjóinn þó foreldrarnir væru ekki eins glaðir. Þó viðurkenni ég að mér finnst snjórinn alltaf heimilislegur og þá sérstaklega þegar um er að ræða froststillur þar sem snjórinn nær að stoppa aðeins við. Eins þoli ég ekki rokið og rigninguna sem við höfum þurft að búa við undanfarnar vikur á undan. Arghh… gæti gert hvern mann vitlausan. Vonandi verður þessi vetur ekki eins erfiður og síðasti vetur með öllu sínu roki og veðraham. Í fyrra kom fyrsti snjórinn ekki að vísu fyrr en 28. október.

Um þjóðfélagið haf blásið harðir vindar undanfarið og ákveðinn kuldi virðist vera kominn í fjármál okkar íslendinga. Veðrið hefur leikið okkur íslendinga svipað undanfarið og virðist sem strax á morgun hlýni aftur og eigi að byrja að rigna. Svona er Ísland í dag. Nóg um veðrið þar til síðar. Kv.Ág.

Afmæliskveðjur

2008-10-04T23:55:00.005Z

Friðgeir Ingi frændi minn átti afmæli þann 21. sept. Ragga vinkona okkar átti afmæli þann 30. sept. Þau Guðjón Ingi og Ragga eignuðust líka dreng þann 25. sept. sem er annað barnið þeirra saman. Viljum við óska þeim til hamingju með nýja fjölskyldumeðliminn og Árni þór til hamingju með litla bróður :-). Þórarinn bróðir átti síðan afmæli í gær, 3. Október. Til hamingju með afmælið kæru afmælisbörn. Kveðja frá okkur öllum á Gauksstöðum. Kv. Ág.

Þarna hefði ég viljað vera!

2008-10-04T00:07:00.007Z

Myndablogg: SJÓRÆNINGJAR Á GAUKSSTÖÐUM

2008-09-29T20:40:00.006Z

Söngfuglar í Garðinum

2008-09-29T19:04:00.003Z

Á fimmtudagdagskvöldið síðasta skrapp ég á tónleika hérna í Garðinum, nánar tiltekið í gamla góða samkomuhúsinu okkar. Fram komu hljómsveitin Crash sem er afsprengi Tónlistarskólans í Garði, Guðrún Haesler sem flutti frumsamin lög og lék á gítar en þetta var reyndar í fyrsta skiptið sem hún kom fram opinberlega. Hún tók líka frábært cover lag sem Tom Wait samdi en það var lagið „Hope I Don't Fall In Love With You“. Tónleikana enduðu síðan dúettinn Songbird sem skipaður er þeim Nönnu Bryndísi Hilmarsdóttur og Sigurði Frey Ástþórssyni. Þau voru auðvitað ljúf eins og venjulega... mikið hæfileikafólk þar á ferð... Nanna Bryndís tók m.a. nýtt lag sem var samið einungis tveimur dögum fyrr. Þetta voru fínir hausttónleikar sem voru hluti af menningardagskrá í tilefni af 100 ára afmæli Sveitarfélagsins Garðs. Takk fyrir mig :-) Kv.Ág.

... 27 dögum síðar

2008-09-28T21:46:00.003Z

Jæja, er ekki alveg kominn tími á nýtt blogg annars? Það er allt búið að vera við það sama síðan síðast. Við höfum fengið þó nokkrar heimsóknir og meira að segja litið sjálf inn á stöku stað :-).

Fyrir hálfum mánuði þ.e. fyrir tveimur helgum komu Birna og Hera og voru hjá okkur frá föstudegi fram á sunnudag. Það var alveg kominn tími á að hittast öll saman en það hafði ekki gerst síðan í byrjun maí. Birna og Hera! Takk fyrir yndislegar stundir. Þessa sömu helgi kíktum við í Úthlíðina til Þórarins bróður og fengum vöfflur a la Olga… nammi namm.

Um síðustu helgi fórum við í Þórkötlustaðaréttir með Þórarni bróður, Olgu, Kristínu og Jörn frá Berlín. Þar var margt um manninn og töluvert fé líka, háfaða rok og rigningadembur annað slagið. Þegar réttunum lauk fórum við öll heim á Gauksstaði og fengum pönnukökur a la Ari. Um kvöldið borðuðum við öll saman og þau gistu líka :-). Þetta var mjög skemmtilegt allt saman og áttum við góða kvöldstund saman þar sem sagðar voru hinar ýmsar sögur m.a. draugasögur. Börnunum leiddist ekki samveran og nýttu þau tímann vel en þau þrjú voru að göltrast hér á náttfötunum á sunnudagsmorgninum. Elsku Þórarinn og co, takk kærlega fyrir góða helgi :-). Þessa sömu helgi kíktum við á Sonju frænku og nýju íbúðina hennar, því miður voru Örvar og Selma ekki heima en krakkarnir fengu að leika samt að dótinu þeirra sem var ekki leiðinlegt og á meðan spjölluðum við hin um daginn og veginn. Aftur… fín íbúð… til lukku með hana!

Þessi helgi sem nú er að lokum komin er búin að vera mjög skemmtileg. Við erum búin að slaka bara vel á við tiltekt og fleira hérna heima. James vinur hans Svavars kom og lék við Svavar í nær allan gærdag. Við buðum svo aftur Særúnu vinkonu og fjölskyldu í mat í hádeginu í dag. Gamaldags íslenskt lambalæri… slurp. Alltaf gott að fá góða vini í heimsókn. Ástþór Helgi og Valdimar Steinn fengu að vera lengur eftir að mamma þeirra fór heim. Í hópinn bættust síðan Danilelline sem er skólasystir Svavars og Lára sem er árinu yngri en þau. Það var kátt á hjalla og ýmislegt brallað. María tók virkan þátt og eru hún og Lára orðnar fínar vinkonur.

Ég kveð að sinni, svolítið kvíðin fyrir næstu viku þar sem ég veit að ég þarf að gera svo margt, en ánægð með helgina… eigið góðar stundir. Kv. Ág.

Sumarið er liðið

2008-09-01T23:00:00.000Z

Sumarið varð frekar stutt þetta árið finnst mér. Þrátt fyrir þá veðurblíðu sem hefur umlukið okkur hérna alveg frá því í maí með smá hléum að vísu. Svavar og María fóru í frí í byrjun júlí og voru í fríi alveg til 17. ágúst síðastliðinn en þá fór María í leikskólann en Svavar byrjaði síðan í skólanum 22. ágúst. María fór á nýja deild sem var opnuð bara núna eftir sumarfrí og er fyrir börn fædd 2004. Nýja deildin heitir Hálsakot en hinar þrjár deildirnar heita: Kátakot, Sælukot og Vinakot. Svavar er nú orðinn skólastrákur og gengur þetta bara vel hjá honum. Skólinn hans heitir Gerðaskóli og er hann annar elsti skólinn á landinu, stofnaður 1872. Svavar var bæði kvíðinn og spenntur í senn að fara að byrja í skólanum. Hann höndlar þetta bara vel og vonandi verður svo áfram :-).

Þetta sumar einkenndist af mikilli vinnu hjá okkur Ara og vissum við vart af því fyrr en sumarið var bara liðið og haustið á næsta leyti en það skríður yfir okkur þessa dagana með sínu rökkri og faðmar mann. Haustkvöldin eru svo falleg hérna í Garðinum, sérstaklega þegar nær að skella á dúnalogn eins og í gærkvöldi. Ahh, þetta er yndislegur tími líka þó sumarið sé hlýtt og bjart.

Það varð eitthvað minna um sumarfrí hjá okkur hjónakornunum eins og var víst síðastliðið sumar líka :-(. Semsagt það er búið að vera brjálað að gera sem er auðvitað gott en þá getur maður kannski farið að standa við skuldbindingar sínar en við komum svolítið þreytt og tætt út úr sumrinu og vonandi getum við tekið okkur eitthvað frí þó ekki væri nema eina og eina helgi. Það er mikil aukning í sölu á vörunum okkar miðað við síðastliðið sumar sem er auðvitað alveg frábært. Einnig hefur aldrei verið jafn mikið að gera í hönnuninni og einmitt núna í ár. Vonandi verður lukkan með okkur áfram hvað verkefni varðar.

Við tókum okkur samt aðeins frí :-). Þann 27. júlí fengum við til okkar fjöldan allan af fólki í gistingu. Þetta voru hann faðir minn, Einar Bjarki, Liv konan hans og börnin þeirra Einar Mar og Ída Eir ásamt tengdamömmu hans Einars sem heitir Gretha. Gretha og Liv voru þetta kvöld að koma frá Noregi en hinir frá Akureyri. Móðir mín og Garðar bróðir ásamt tveimur barna hans þeim Bergvini og Kamillu gistu hjá Þórarni bróður. Daginn eftir þann 28. stóð til að yfirgefa fasta landið og hélt hópurinn allur, ásamt hluta af systkinum föður míns, siglandi með Herjólfi yfir til Vestmannaeyja. Lengra var nú ekki farið frá landinu þetta sumarið :-). Þessi ferð var farin til að fagna því að faðir minn átti sjötugsafmæli þann 30.

Ferðin út í Eyjar var ekki skemmtileg, gífurleg undiralda og slæmt sjóveður enda urðu langflestir farþegar ferjunnar sjóveikir en fólk var þó misveikt og þeir sem tóku sjóveikistöflur og töldu sig bara nokkuð örugga þeir sluppu sko aldeilis ekki. Sjóveikin brá fljótt af flestum en sjóriðan sagði til sín í einhvern tíma á eftir.

Dvölin í Eyjum var aftur á móti yndisleg, frábært veður og útsýnið úr bústöðunum sem pabbi var búinn að leigja var alveg frábært þ.e. þegar við sáum það eftir að þokunni létti daginn eftir komudag. Á þriðjudeginum var afmælinu fagnað þó enn væri dagur í raunverulegt afmæli. Enda notaði pabbi það óspart það kvöldið að hann væri nú aðeins 69. Frábær veisla… grillmatur og meðlæti… ásamt ræðum… lifandi tónlist… afmælissöng… aftur afmælissöng… og nokkrusinnum enn, en litlu frænkurnar komu aftur og aftur og sungu fyrir afa sinn og bræddu auðvitað hjartað hans. Daginn eftir á sjálfan afmælisdaginn var 80 ára hitamet slegið á Stórhöfða sem segir svolítið um það hve gott veður við fengum. Það var gaman að fagna þessum tímamótum á þennan hátt með föður mínum. Mamma og pabbi, takk fyrir frábæra viku í Eyjum. Við fórum heim á fimmtudeginum þegar allir aðrir streymdu til Eyja og yfirgáfum heitasta staðinn enda vorum við spurð af starfsmanni afhverju við værum að fara þar sem Þjóðhátíðin væri nú að byrja. Ferðin heim gekk eins og í sögu alveg sléttur sjór og fallegt sjóveður, svona eins og þetta á að vera. Þar sem ferðin heim var þetta góð er aldrei að vita nema maður skelli sér einhverntíman til Eyja aftur :-).

Föstudeginum eyddi stórfjölskyldan í Nauthólsvíkinni og seinnipartinn var skellt upp annarri afmælisveislu, núna til heiðurs Kamillu litlu sem átti afmæli nokkrum dögum síðar. Þessi dagur var líka fínn í alla staði.

Helgin eftir fór í dagsferðir. Á laugardeginum sýndum við fólkinu Reykjanesið eða þann hluta sem fæstir höfðu komið á. Við skoðuðum m.a. fornmannaleiði og rúnastein, sýninguna Orkuverið jörð, fundum kraftinn og orkuna sem kemur frá virkjuninni, kíktum á Valahnjúk og á Brimketilinn þar sem sagan segir að tröllkona hafi baðað sig. Dagurinn entist allur í þetta og voru allir þreyttir þegar heim var komið. Fólkið gisti allt inni í Reykjavík hjá Þórarni bróður og í orlofsíbúð sem pabbi hafði fengið á leigu. Við Gauksstaðagengið sváfum heima. Sunnudagurinn fór í langferð þar sem ferðinni var heitið að Gullfossi og Geysi en þangað höfðu Einar Mar og Ída aldrei komið. Þvínæst lá leiðin að Seljavallarlaug en komið við fyrst að safninu á Skógum. Þetta er frábært safn… eitt það skemmtilegasta að sækja heim. Farið var hratt yfir og þyrftum við Ari kíkja þangað fljótlega aftur því þarna er heilmargt að sjá. Að Seljavallarlaug komumst við, yndislegt umhverfi… svo magnað eitthvað :-) að vísu rigndi á okkur og þokan hékk í fjallshlíðinni en það gerði staðinn mjög sjarmerandi. Það væri gaman að koma þarna aftur í bjartara veðri líka. Það skelltu sér flest allir í laugina nema við garðálfarnir og móðir mín. Svavar var ekki ánægður með foreldra sína að hafa ekki tekið sundfötin hans með. Eftir þennan dag voru allir ferlega þreyttir og varð ég eiginlega lasin af þreytu um kvöldið.

Mánudagurinn var tekinn mjög rólega framan af degi… slakað á og reynt að ná sér eftir langan ferðadag. Seinnipartinn fórum við inn í Reykjavík þar sem við fórum með stórfjölskyldunni út að borða á Þremur frökkum í boði Grethu. Hún er ekkert smá yndisleg þessi kona :-). Alltaf gaman að eiga stundir með henni. Svavar og María átu næstum yfir sig en þau fengu plokkfisk fyrir börn sem ég mæli hiklaust með. Svavar sagði meira að segja „Hingað vil ég koma aftur“. María át næstum á sig gat og varð ég að bera hana út í bíl þar sem þau sofnuðu strax þessar elskur enda búin að vera mikil keyrsla á þeim dagana á undan.

Þriðjudagurinn var dagur kveðjustundarinnar en Einar Bjarki og fjölskylda hélt af landi brott og kvöddum við þau á flugvellinum. Þetta var mjög skemmtilegur tími sem við áttum með fólkinu mínu og viljum við þakka þeim fyrir skemmtilega samveru. Þegar ég lít til baka núna þá varð úr þessu alveg 9 daga frí. Við tókum líka tvær langar helgar í ágúst þegar við skruppum tvær helgar í röð til Akureyrar. Við tökum okkur vonandi síðan einhverja daga í frí núna í haust allavegana reynum við að gera eitthvað einhverja helgina. Við þá sem lásu þessa löngu færslu allt til enda vil ég segja „þetta er ótrúleg elja hjá ykkur“ Hafið það gott en ég kveð að sinni. Kv.Ág.

Afmæliskveðjur

2008-09-01T22:28:00.003Z

Jæja þá er það afmæliskveðjupakkinn :-) Hann faðir minn átti stórafmæli þann 30 júlí síðastliðinn og fórum við nánasta fjölskyldan af landi brott þar sem hann bauð okkur í frábært teiti. Segi nánar frá því síðar ;-). Þann 4. ágúst átti Kamilla hans Garðars bróður afmæli, þann 8. ágúst varð Örvar Ernir hennar Sonju 6 ára, Elísabet Anna þeirra Helgu og Rúnars átti afmæli þann 11. Erla móðursystir þann 22. ágúst, Arndís Tómasar vinkona okkar þann 23. Árni Þór þeirra Inga og Röggu þann 26. og Einar bróðir varð fertugur þann 28. ágúst. Í dag eiga frænkur mínar þær Svandís Þóra og Fríða afmæli og á morgun á Sigga frænka afmæli ásamt Huldu sem er sambýliskona tengdapabba. Vonandi gleymdi ég engum í þetta skiptið... viljum við óska öllum þessum afmælisbörnum innilega til hamingju með daginn. Kveðja frá okkur hérna á Gauksstöðum. Ág.

Við erum á lífi ennþá

2008-08-28T09:48:00.002Z

Bara að láta vita að við erum á enn á lífi og erum bara hress, takk fyrir. Hérna er einn góður sem að við rákumst á.

Maður í loftbelg sá að hann var að missa hæð. Hann tók eftir konu á jörðinni, lækkaði flugið aðeins meira og kallaði til hennar: Afsakið, geturðu hjálpað mér? Ég lofaði að hitta vin minn fyrir klukkutíma, en veit ekki hvar ég er.
Konan svaraði: Þú ert í loftbelg sem svífur í 10 metra hæð, milli 40. og 41. Norðlægrar breiddargráðu og milli 59. og 60. Vestlægrar lengdargráðu.
Þú hlýtur að vinna við tölvur, sagði loftbelgsmaðurinn.
Það geri ég, svaraði konan. Hvernig vissirðu það ?
Nú, svaraði maðurinn, allt sem þú sagðir mér er tæknilega rétt, en ég hef ekki hugmynd um hvaða gagn er af þeim upplýsingum, og reyndar er ég enn villtur. Satt að segja þá hefur ekki verið mikil hjálp frá þér. Ef eitthvað er þá hefurðu helst tafið ferð mína.
Konan svaraði: Þú hlýtur að vinna við stjórnun.
Já, sagði maðurinn. En hvernig vissir þú það?
Nú, sagði konan, þú vissir hvorki hvar þú ert né hvert þú ert að fara.
Eintómt loft hefur komið þér þangað upp sem þú ert. Þú gafst loforð sem þú hefur ekki hugmynd um hvernig á að efna og þú ætlast til þess að fólk fyrir neðan þig leysi þín vandamál. Reyndar ertu í sömu stöðu og þegar við hittumst, en nú er það einhvern veginn mín sök.

Opnun á galleríinu frestað :-(

2008-07-25T09:58:00.003Z

Eins og margir vita þá hefur staðið til að opna hér sölugallerí á vinnustofunni okkar. Þar verður hægt er að koma og sjá hvað við erum að gera. Í galleríinu verðum við einnig með vörur sem eru hvergi annarsstaðar í sölu og eru þetta þá oft hlutir sem við framleiðum í frekar litlu magni eða í efni sem ekki þolir fjöldaframleiðslu. Vegna mikillar vinnu á öðrum vettvangi í vetur og í vor og mikillar eftirspurnar núna í sumar hefur allur okkar tími farið í að framleiða fyrir aðra aðila sem selja vörurnar okkar. Því verðum við að fresta því að opna hérna hjá okkur. Við stefnum þó á að halda formlega opnun núna í ágúst eða byrjun september. Þá verðum við tilbúin að taka á móti gestum sem og stærri hópum. Meira um það síðar. Kv.Ág.

María fær nýtt rúm og Gunnar nýja íbúð :-)

2008-07-22T23:01:00.003Z

Tókum smá útréttingatúr í Reykjavík í dag… hluti sem þurfti í kertagerðina og fleira. Í leiðinni komum við í IKEA og keyptum nýtt rúm handa Maríu. Það var kominn tími á nýtt rúm fyrir löngu en hún hefur verið í gamla rimlarúminu frá því hún var mánaðargömul eða svo. Á heimleiðinni kíktum við í heimsókn til Gunnars en hann á afmæli í dag og þau eru ný flutt líka þannig við fengum sýningarrúnt um nýju íbúðina. Hann var bara hress og kátur og bauð okkur meira að segja upp á afmælisköku sem dóttir hans Kolbrún hafði bakað og fært honum. Kolbrún lék við Svavar og Maríu og ég var meira að segja rekin út úr herberginu hennar Kolbrúnar af Maríu þegar ég ætlaði að kíkja á þau, hvað þau væru nú að bralla. Til hamingju með nýju íbúðina kæra fjölskylda, gaman að kíkja á ykkur.

María var að vonum ánægð og mikil tilhlökkun fylgdi því að setja upp nýja rúmið. Bæði María og Svavar fengu að aðstoða við verkið. Á meðfylgjandi myndum má sjá hve spennt og hjálpsöm hún María er. Að fá svona nýtt og stórt rúm fylgir nefnilega svolítið mikið frelsi því nú kemst maður nefnilega sjálfur út úr rúminu án hjálpar. Þetta nýtti María sér óspart í kvöld og ætlaði aldrei að geta sofnað. Kv.Ág.

Úr varð yndisleg helgi

2008-07-22T10:16:00.003Z

Sunnudagurinn og mánudagurinn urðu líka skemmtilegir frídagar en við fengum gesti sem gistu og alles :-). Þetta voru Einar Bjarki bróðir ásamt börnunum sínum Einari Mar og Ídu Eir en þau voru að koma með flugi frá Norge til að dvelja hér smá tíma á Íslandi. Krakkarnir náðu fljótlega vel saman. Svavar og Einar Mar voru strax farnir að bralla ýmislegt saman og sama má segja um þær frænkurnar Maríu og Ídu Eir. Ég gleymdi að taka myndir af frændsystkinunum en læt hér fylgja myndir sem Einar bróðir skildi eftir í tölvunni minni :-). Þegar Norðmennirnir fóru með flugi til Akureyrar seinni partinn í gær varð frekar tómlegt hérna á Gauksstöðum og voru Svavar og María frekar afundin og úrill og tóku hérna þvílíkar rimmur í einhvern tíma á eftir. Alltaf gaman að fá góða gesti :-). Núna er stanslaust spurt af lítilli stúlku og aðeins stærri dreng „ Hvenær förum við til Akureyrar?“ „ Við erum búin að vera svo lengi heima“. Núna í augnablikinu vælir María og vill fara til Akureyrar og ég segi henni að það sé ekki hægt núna þar sem við þurfum að vinna… æji litlu dúllurnar mínar ég vildi ég gæti bara verið í fríi með ykkur :-(. Kv. Ág.

Helgin byrjaði vel

2008-07-22T10:07:00.003Z

Það var aldeilis gestagangur um helgina hjá okkur hérna á Gauksstöðum. Upp úr hádegi á laugardeginum kom hluti af fjölskyldunni hans Ara í heimsókn. Þetta voru tengdapabbi og Hulda, Gunnar bróðir hans ásamt Steinunni og dóttur þeirra Kolbrúnu og Kristlaug systir hans ásamt sínum ektamanni, Hjölla og barnabarni þeirra honum Óðni Andra. Það voru grillaðir dýrindis hamborgarar og pylsur hérna úti í garði. Sannkölluð garðveisla þar sem allir nutu veðursins og létu geisla sólarinnar leika um sig. Svavar afi tók smá fótbolta með krökkunum, Kristlaug og Gunnar rifjuðu upp smá takta í golfinu og Kolbrún tók sig til og las fyrir krakkana úti átúni. Svavar og María vildu bara eiga Kolbrúnu held ég og spurðu hvort hún mætti ekki koma daginn eftir líka… góð frænka í þeirra augum. Þau elska það að einhver skuli gefa þeim svona tíma og athygli. Þetta var mjög skemmtileg stund og alltaf er jafn glatt á hjalla þegar þessi hópur hittist… sem er aðeins of sjaldan… mættum alveg eiga oftar svona stundir saman. Við þökkum kærlega fyrir góðan hitting öllsömul :-). Kv.Ág.

Afmæliskveðjur

2008-07-22T09:46:00.004Z

Um daginn eða þann 6. júlí átti Sonja frænka afmæli og þann 10. júlí átti hann Svavar tengdapabbi afmæli, þann 20. júlí átti Ragnar Ólafur hennar Sæunnar 4 ára afmæli og í dag á síðan Gunnar bróðir Ara og æskuvinur hans Guðjón Ingi afmæli. Viljum við óska öllum þessum afmælisbörnum til hamingju með daginn. Kveðja frá okkur garðálfunum. Kv.Ág.

Stiklað á stóru

2008-07-17T09:10:00.003Z

Hérna kemur smá færsla í dagbókina okkar góðu. Eins og fram hefur komið þá var júní mjög erfiður mánuður hérna á Gauksstöðum fyrir alla. Mikil vinna allan daginn, öll kvöld fram á nótt og flest allar helgar. Þetta var vinna bæði í hönnun og skipulagi vegna 100 ára afmælis Garðs, hönnun og skipulag fyrir Sólseturshátíðina ásamt hönnun fyrir hina ýmsu viðskiptavini. Við meira að segja frestuðum einhverjum verkefnum þar sem við hreinlega komumst ekki yfir allt saman sem þurfti að gera. Því miður sat Lyng á hakanum og höfðum við lítinn tíma til að undirbúa sumarið með því að framleiða vörur inn á lager. Þetta þýðir að nú í dag erum við töluvert bundin við að framleiða vörur því pöntununum rignir hér inn. Það er unnið mikið þessa dagana líka en þó höfum við tekið einn og einn dag frekar rólega.

Við erum þó komin töluvert á veg að undirbúa opnunina á galleríinu okkar hérna en því var rutt aðeins áfram í júní svo við gætum opnað myndlistarsýninguna okkar sem opin var frá 14. Júní – 30. Júní. Frábær tilfinning að þetta sé alveg að hafast :-). Sýningin gekk vel og komu sennilega yfir 350 gestir og sáu sýninguna á meðan hún var opin. Galleríið hefur verið lokað frá júní en verður aftur opnað í bráð þegar sölugalleríið verður opnað formlega. Stefnt er á að opna laugardaginn 26. júní. Nánar um það síðar :-).

Svavar og María fóru í sumarfrí þann 7. júlí síðastliðinn og var föstudagurinn 4. síðasti vinnudagurinn hjá þeim. Strax á föstudeginum var haldið upp á það að fríið væri hafið og var farið og fengið sér ís í Reykjanesbæ. Á laugardeginum fórum við inn í Reykjavík þar sem við fórum, eins og Ari var búinn að segja ykkur frá hér fyrr, í húsdýragarðinn með Þórarni og Kristínu. Á mánudeginum fórum við síðan í dagsferð á Snæfellsnesið þar sem við fengum líka þetta dúndur veður 22 stiga hita og næstum því logn. Við fórum í Djúpalónsfjöruna en þangað er dýrlegt að koma… svo mikil orka þarna… sem gott er að sækja. Þar blés nú samt töluvert á okkur þannig við þurftum að dúða okkur og klæða af okkur veðrið. Þetta var mjög skemmtilegur dagur sem allir nutu í botn. Þriðjudagurinn var síðan dagur útréttinganna og var farið í Reykjavík og ýmislegt efni í vörur sótt. Auðvitað var komið við í dótabúð fyrir krakkana þar sem þau voru dugleg að flengjast þetta með okkur. Annars þurfa þau ekkert dót þar sem nóg er til af því hérna heima. Við tóku síðan vinnudagar sem þó hafa sumir hverjir breyst í mikla skemmtun fyrir krakkana þar sem þau hafa fengið aðra krakka í heimsókn og sótt þau sömu líka heim. Þetta eru James Robert, Ástþór Helgi og Valdimar Steinn.

Nú er fimmtudagsmorgun og veðrið virðist ætla að verða yndislegt eins og í gær. Undangengnir eru nokkrir rigningadagar sem voru kærkomnir fyrir gróðurinn sem var alveg að skrælna hérna… túnið er meira að segja að verða grænt aftur eftir sláttinn. Túnin á Gauksstöðum voru nefnilega slegin 29. júní og hirt þann 30. Sprettan var einhverju minni en árið áður en um 28 rúllur fengust af túninu núna. Það er svo gaman þegar túnin hafa verið slegin… svo snyrtileg og falleg :-). Veðrið í júní var frábært nema auðvitað frá föstudeginum 27. (frá níu um kvöldið eða um leið og tónleikarnir hófust sem var fyrsta atriðið tengt hátíðinni) og fram yfir helgina sem Sólseturshátíðin stóð… grrrrr… háfaða rok og kaldur vindurinn. Spáin virðist vera góð næstu dagana eða alla vegana fram yfir næstu helgi. Svo nú er að njóta þess :-). Hafið það gott! Kv.Ág.

Húsdýragarðurinn heimsóttur

2008-07-15T12:01:00.005Z

Jæja, við skelltum okkur í Húsdýragarðinn með Svavari og Maríu í byrjun mánaðarins. Þau áttu það svo sannarlega skilið eftir þá vinnutörn sem var að baki. Eins og sést þá nutu þau sín í botn og ekki skemmdi það fyrir að Kristín frænka var með í för ásamt pabba sínum. Takið eftir myndinni þar sem Svavar er að hvísla að systur sinni. Hann var búinn að suða svo mikið í okkur að fara í rafmagnsbílana, þarna var hann að biðja Maríu að taka við.

Snilldarbandið Hjaltalín

2008-07-12T00:12:00.003Z

Já, það er langt síðan við blogguðum síðast, við vorum bara að jafna okkur eftir Sólseturshátíðina sem var haldin í lok júní. Eins og þeir sem þekkja okkur vita þá tókum við að okkur að skipuleggja og sjá um framkvæmd á hátíðinni þetta árið og það varð dálítil törn að láta það ganga upp en það tókst vel og var bara þrælskemmtilegt allt saman. Hluti af dagskránni voru tónleikar á föstudagskvöldinu 27. júní með hljómsveitinni Hjaltalín. Það urðu alveg yndislegir tónleikar. Eftir að dúettinn Songbird var búinn að hita upp þá stigu þau á svið og skemmtu okkur með sinni frábæru spilamennsku og söng. Þau eru alveg mögnuð skal ég segja ykkur og eiga eftir að ná langt. Þetta band hefur algjöra sérstöðu, maður hefur ekki heyrt neitt þeim líkt, aldrei.

Að njóta góða veðursins

2008-06-22T10:08:00.002Z

Framan af deginum í gær og fyrrakvöldið einkenndist af stressi í okkur hjónunum. Þessi Sólseturshátíð og allar þessar hátíðir hérna í Garðinum eru farnar að taka sinn toll hjá okkur. Það er erfitt að standa í skipulagningu og mikilli vinnu í svona langan tíma. Svo þegar hlutirnir ætla sér ekki alveg að ganga upp þá verður þetta frekar erfitt allt saman. Þetta á samt allt eftir að blessast og stefnir bara í skemmtilega og áhugaverða Sólseturshátíð um næstu helgi þ.e. 27. Til 29. júní. Bara að drífa sig með tjaldið eða fellhýsið í sveitina um næstu helgi og taka þátt í þessu með okkur :-).

Í gær var sýningin okkar opin frá 14 – 17 og þannig verður það líka í dag. Þar sem við vorum með opið í gær urðum við að vera hérna úti á vinnustofu. Við notuðum því tækifærið og böðuðum okkur í sólinni hérna úti, snyrtum aðeins umhverfið, hnýttum nokkur men og nutum samveru vina okkar. Hildur Gylfa vinkona okkar kom hérna í heimsókn ásamt dóttur sinni Elmu. Þær böðuðu sig í sólinni með okkur, borðuðu „arapönnsur“ og nutu sveitarinnar. Robert pabbi hans James, besta vinar Svavars, kom líka og stoppaði í góða stund þegar hann sótti James en hann var hérna allan daginn í gær með Svavari… þeir eru svo góðir félagar. Alex Breki birtist hérna líka úti og lék við þá. María og Elma náðu bara vel saman og léku sér hérna á túninu m.a. og hurfu inn í grasið og blómin eins og einhverjir blómálfar.

Gærkvöldið einkenndist svo af skipulagi og vinnu… þetta tekur engan enda. Nú er bara rétt um vika þar til hátíðin er um Garð gengin og þá er hægt að fara að einbeita sér meira að Lyng og vörunum okkar, ásamt því að sinna okkur sjálfum og börnunum. Ég get vart beðið eftir því að þessi „heavy“ mánuður verði liðinn.

Dagurinn í dag virðist ætla að einkennast af veðurblíðu eins og dagurinn í gær. Þannig þið sem hafið tök á því… njótið dagsins :-). Það ætla ég allavegana að reyna. Kv.Ág

17. júní

2008-06-21T23:50:00.003Z

Hátíðarhöldin á 17. júní gengu bara mjög vel hérna í Garðinum og var þátttakan virkilega góð. Eftir að hátíðarhöldunum lauk skelltum við Ari okkur inn í Hafnarfjörð með Svavar og Maríu. Við áttum stefnumót við Þórarinn, Olgu og Kristínu á Víkingahátíðinni. Við Ari höfum reynt að kíkja alltaf á þessa hátíð en vegna anna þessa dagana þá urðum við að skjóta þessu svona inn á milli hjá okkur. Það var frábært að hitta liðið úr Úthlíðinni... allt of langt síðan síðast.

Krakkarnir náðu að nýta tímann og leika sér saman m.a. í feluleik. Við keyptum okkur smá snarl, skoðuðum hátíðina og nutum veðurblíðunnar. Andrúmsloftið var mjög slakandi, færeyingar syngjandi söngva, maður að spila á hljóðfæri, svona einhverskonar gítar en samt ekki… veit ekki hverslags hljóðfæri þetta var, annar að spila á flautu úr beini, við og við heyrðist hávær „fuglasöngur“ sem barst úr litlum leirfuglum sem fylltir eru af vatni og blásið í og þá myndast hljóð sem er eins og fuglasöngur. Kona í tjaldi syngur „…mitt er þitt og þitt er mitt, þú veist hvað ég meina…“ - svo fallega sungið með lágstemmdri röddu. Eins og vanalega bar marga skemmtilega og fallega hluti fyrir augu okkar… alltaf gaman að kíkja á víkingana. Stoppið var nú ekki mjög langt í Hafnarfirði og kominn tími til að halda til baka í Garðinn þar sem á morgun var vinna og leikskóli. Kv.Ág.

Fallega fjaran okkar

2008-06-17T00:00:00.002Z

Við skruppum eitt kvöldið hérna útí fjöru við vitana þar sem veðrið var svo gott, hægur andvari og hlýtt. Þetta er alveg yndislegur staður. Hvít skeljasandsfjaran er orðin svo hrein og fín eftir að Blái herinn hans Tómasar Knúts er búinn að hreinsa hana af öllu drasli með dyggri aðstoð bæjarstarfsmanna og sjálfboðaliðanna úr SEEDS samtökunum. Það væri hægt að stunda þarna sjóböð svei mér þá. Það er aldrei að vita nema maður prófi að skella sér úti einhverntíman þegar gott er veður.

Myndablogg: OPNUNARHELGIN

2008-06-16T23:59:00.000Z

Margir sóttu okkur heim um helgina

2008-06-16T23:53:00.000Z

Margt var um manninn á Gauksstöðum alla helgina en sýningin okkar var opnuð kl. 16 á laugardeginum hérna í vinnustofunni okkar. Opnunin var vel sótt og dreif fólk að jafnt og þétt alveg fram yfir kl.19 þó sýningin hefði einungis átt að vera opin í tvo tíma. Á sunnudeginum var síðan opið eftir hátíðarhöldin í íþróttahúsinu eða frá kl. 16 til 20. Þetta var mjög skemmtileg helgi í alla staði og gaman að taka á móti öllu þessu fólki sem sýndi okkur mikinn áhuga og því sem við erum að gera. Ég gæti trúað því að fjöldi gesta hafi jafnvel farið yfir 300 þessa helgina. Gaman af þessu :-).

Við höfðum ekki pössun fyrir krakkana frekar en fyrri daginn þannig þau Svavar og María flengdust þetta með okkur alla helgina. Þau stóðu sig eins og hetjur bæði tvö, svo stillt og kurteis. Mest allan tímann léku þau sér hér fyrir utan við að moka sandi í fötur og þessháttar… ég er svo stolt af þessum elskum :-). Eins og þau eru búin að vera dugleg og þolinmóð við okkur á meðan þessi vinnutörn hefur staðið yfir. Ég finn samt að þau eru alveg að fara að fá nóg af þessari stöðugu vinnu í okkur Ara, alla daga, öll kvöld og flest allar helgar undanfarið. Því miður verður sviðað uppi á teningnum næstu tvær vikurnar þar sem undirbúningurinn fyrir Sólseturshátíðina í Garði stendur sem hæst þessa dagana ásamt því að við þurfum að vera dugleg að vinna vörur fyrir Lyng þannig við getum afgreitt þær pantanir sem koma inn á borð. Það eru þrjár vikur í sumarfrí hjá þeim og þá ætlum við að fara að reyna að slaka aðeins á og taka okkur einhverja frídaga og sinna krökkunum og okkur sjálfum.

Á morgun er 17. júní og ég verð að vinna við hátíðarhöldin í íþróttahúsinu, Ari ætlar að fara þangað með krakkana að sjá skemmtiatriðin og þessháttar. Það er ekki hægt að taka það frá þeim að fá að taka þátt í hátíðarhöldunum á þjóðhátíðardeginum þannig sýningin okkar verður ekki opin á morgun þó allar aðrar sýningar hérna verði opnar. Aftur á móti verður opið hjá okkur eins og hinum bæði á laugardaginn næsta og sunnudag frá kl. 14 til 17. Þið sem ekki hafið séð sýninguna okkar, endilega að drífa sig í smá bíltúr í sveitina :-). Kv.Ág.

Til hamingju með daginn Garðbúar!

2008-06-15T21:30:00.003Z

Nú er þessi yndislegi hátíðardagur að kveldi kominn. Dagurinn byrjaði snemma, Ari lagði síðustu hönd á heiðursborgara-vegginn á bæjarskrifstofunum fyrir níu í morgun en lágmyndirnar af heiðursborgurum Garðs voru afhjúpaðar þar síðan um klukkan 10. Síðan tók við lokaspretturinn að undirbúninginum í íþróttamiðstöðinni þar sem hátíðardagskráin var síðar í dag. Ari var að aðstoða við að koma upp hljóðkerfinu og redda því sem þurfti að redda svo hátíðin gæti byrjað. Hann var þar alveg til að verða 14 þegar hátíðardagskráin byrjaði. Ég, Svavar og María fórum og sáum þegar listaverkið Skynjun var afhjúpað við hátíðlega og fallega athöfn um 11 leitið í morgun, Það voru tvær gamlar sjómannskonur sem afhjúpuðu verkið sem var vel við hæfi þar sem verkið á að tákna og standa fyrir þær konur í Garðinum sem í gegnum tíðina hafa beðið heima eftir að mennirnir, synirnir og bræðurnir skiluðu sér heim aftur af sjónum. Mjög táknrænt verk og skemmtilegt. Við afhjúpinina drógu þessar konur niður band sem bundið var utan um léttan dúk sem vafinn var utan um sex metra háa konuna. Þetta var alveg frábær gjörningur þar sem búið var að koma verkinu svo fallega fyrir þarna í móunum, kríurnar svimuðu yfir og steyptu sér gargandi niður að hópnum sem safnast hafði saman við þessa athöfn... þær tóku þátt í þessu með okkur... síðan þegar böndin voru dregin niður fór þessi þunni, létti dúkur að flakta í vindinum og líktist slæðu sem liðaðist um líkama konunnar og á síðasta augnablikinu lá „slæðan“ eingöngu fyrir andliti konunnar þar sem hún dróst hægt og svo mjúklega frá vitum hennar... oh, þetta heppnaðist fullkomlega... svo fallegt! Við Ari skiptum síðan liði og var hann með krakkana á meðan ég fór á hátíðardagskrána klukkan 14. Þetta var mjög skemmtileg dagskrá sem rann ljúft yfir. Ég er bara mjög ánægð með hve vel heppnaðist allur tónlistarflutningurinn og tónverkið hans Áka sem flutt var og vakti misjöfn viðbröð fannst mér vera áhugavert listform. Þetta var svona nútíma tónverk flutt af blásturshljóðfærum og tölvu og á tjaldi að baki tónlistarmönnunum var varpað texta. Í byrjun fannst mér ég vera að hlusta á lúðrasveit vera að stilla hljóðfærin sín; stakir og einmana tónar ómuðu og virtust ekki eiga samleið með öðrum... smám saman fór nú samt ýmislegt að gerast og tónarnir sem tölvan gaf frá sér urðu mjög áhugavert ískur.Málið er að það sem tölvan flytur er ekki fyrirfram unnið heldur vinnur hún jafnóðum úr því sem hljóðfæraleikararnir leika. Ekki það að ég „fíli“ tónverkið sem slíkt þá fannst mér það samt áhugavert og líkjast meira gjörningi. Þetta var áhugaverð og skemmtileg upplifun. Vinkona mín sem var þarna líka líkti þessu við það að hlusta á náttúruna; á vindinn... ískur í glugga eða einhverju slíku... svona eins og að sitja og hlusta á brjálað veður sem lemur húsið að utan. Miðað við þessa lýsingu ætti nú karli föður mínum að líka verkið en hann elskar nefnilega að sitja inni og hlusta á snjóstorminn úti. Eftir að hátíðardagskránni lauk um 4 dreif ég mig heim og nú var komið að því að opna sýninguna aftur en allar sýningarnar voru opnar frá 16 til 20. Þetta var mjög áhugaverð og skemmtileg helgi fyrir garðbúa og gesti þeirra og vil ég óska garðbúum öllum innilega til hamingju með daginn í dag sem var svo hátíðlegur og skemmtilegur í alla staði. Takk fyrir mig :-) Kv.Ág.

Myndlistasýning á Gauksstöðum

2008-06-14T01:52:00.003Z

Þér er hér með boðið á opnun samsýningar okkar í vinnustofunni okkar hérna á Gauksstöðum en opnunin er kl. 16:00 í dag. Sýningin er opin í dag til kl. 18:00 og svo aftur á morgun frá c.a. 16:00 til 20:00. Sýningin er haldin af tilefni 100 ára afmæli Sveitarfélagsins Garðs en einar fimm aðrar sýningar verða opnaðar líka í dag hérna í Garðinum. Svo endilega lítið við, upplagt að fá sér smá bíltúr í sveitina í góða veðrinu.

Dagskrá 100 ára afmælisins má finna á vef Sveitarfélagsins.

Kv. Ágústa og Ari

Góðir gestir í Garði

2008-06-07T19:53:00.002Z

Á dögunum komu 16 sjálfboðaliðar frá SEEDS samtökunum í Garðinn en þau hafa unnið að því að aðstoða við undirbúning fyrir 100 ára afmæli bæjarins. Þau hafa verið að hjálpa okkur að taka hér til og gera fallegt í umhverfinu okkar og allt er þetta gert í sjálfboðavinnu. Þetta unga fólk er alveg yndislegt svo vinalegt og kurteist. Það væri óskandi að heimurinn væri svona… þar sem hjálpast er að án þess að krefjast greiðslu fyrir það. Í dag er það þannig að fólk hefur ekki lengur tíma eða vilja til að hjálpa náunganum og ef „hjálpin“ berst þá er yfirleitt einhvers krafist á móti. Þó eru til undantekningar á þessu og enn eru til gæðablóð í þessum heimi… sem betur fer… annars værum við glötuð.

Þessi samtök eru alveg frábær og vildi ég að ég hefði kynnst einhverju slíku þegar ég var unglingur. Þau vinna svo þakklátt starf og engum háð. Lesa má um samtökin á heimasíðunni þeirra: www.seedsiceland.org.

Í gær buðu SEEDS-krakkarnir Garðbúum upp á smakk af þjóðarréttum sjálfboðaliðanna en þau koma frá sjö löndum. Þetta var haldið hér í Samkomuhúsinu okkar hérna í Garðinum og var alveg bráðskemmtilegt að rölta yfir til þeirra og fá að taka þátt í þessu með þeim. Svavar og María nutu sín líka í botn enda voru þarna fyrir Ástþór Helgi og Valdimar úr leikskólanum… það var mikið fjör hjá rollingunum en þau léku sér mestan tímann fyrir utan samkomuhúsið.

Í dag fór Særún með þau í ferð um Reykjanesið og enduðu þau ferðina í vinnustofunni - galleríinu okkar hérna á Gauksstöðum. Þetta var mjög gaman og sýndum við þeim hvað við erum að gera og sögðum þeim aðeins frá okkur. Alltaf gaman að fá góða gesti í heimsókn. Þetta er reyndar þriðji hópurinn sem kemur til okkar. Fyrstir komu hópur nemenda í gullsmíði við Iðnskólann (10 manns), svo komu leiðsögumenn Reykjaness (9 manns) og núna SEEDS-hópurinn (16 manns).

Þá læt ég þetta nægja í dag og vona að fólk hafi notið veðursins í dag en hérna hjá okkur er nefnilega búið að rigna reiðinnar ósköp ásamt því að bæði kaldur og napur vindurinn hefur farið hér mjög hratt yfir í dag. Kv.Ág.

Annir vikunnar

2008-06-06T23:36:00.001Z

Nú er enn aftur komið föstudagskvöld… vá hvað tíminn líður hratt þessa dagana. Þessir dagar eru yndislegir, svo bjartir, stilltir, svo fallegt og gott veður og það er svo bjart fram eftir öllu. Nú er klukkan rétt farin að ganga tólf og sólin er ekki ennþá sest. Ef þið hugleiðið það aðeins þá eru ekki nema 15 dagar í lengsta dag ársins en sumarsólstöður eru þann 21. júní. Eftir það fer dagurinn að styttast aftur… sumarið er í raun alltof stutt hérna hjá okkur frónbúum. Ekki það að ég kvíði haustinu því ég elska haustið, það hefur verið minn uppáhaldstími í gegnum tíðina.

Vikan er búin að vera frekar strembin og höfum við unnið alla daga og langt fram eftir öllu… frekar langir dagar… frekar þreytt hjón :-). Undirbúningurinn fyrir 100 ára afmæli Sveitarfélagsins Garðs, sem er um næstu helgi, er núna í hámarki og þarf að hnýta alla enda í næstu viku og klára að setja upp afmælishátíðina :-). Einnig er verið að klára undirbúninginn fyrir 17. júní hátíðarhöldin sem auðvitað verða haldin hátíðleg hér í bæ og verður aðal áherslan á börnin. Einnig er undirbúningurinn fyrir okkar yndislegu Sólseturshátíð sem verður haldin í lok mánaðarins eða 27. – 29. júní á fullu líka. Semsagt margt að gerast hjá Garðbúum þennan mánuðinn. Hellingur að gera í hönnuninni líka og höfum við ekki einu sinni komist yfir allt sem þarf að gera þar. Við erum búin að fresta nokkrum verkum alveg fram í júlí þar sem við hreinlega höfum ekki haft tíma til að sinna öllu vegna anna. Fullt að gera í framleiðslunni á vörunum okkar hjá Lyng líka, hefðum þurft að vera kominn með góðan lager núna… en það er víst ekki hægt að gera meira… það eru jú aðeins 24 tímar í sólarhringnum. Að vísu græðir maður ótrúlega mikinn tíma ef maður bara sleppir sjónvarpinu… þetta er svo mikill tímaþjófur :-(. Svo er auðvitað framundan líka að opna galleríið okkar í einhverri lítilli mynd til að byrja með auk þess sem við Ari verðum með myndlistarsýningu hérna í vinnustofunni okkar þann 14. júní í tengslum við afmælishátíðina um næstu helgi auk þess sem við erum að hjálpa Ásgeiri á Byggðasafninu við að setja upp ljósmyndasýningu fyrir sama tilefni. Semsagt í nógu að snúast þessa dagana og er óhætt að segja að við Ari látum okkur ekki leiðast frekar en fyrri daginn. Það er svo gott að vera lifandi :-) Kv.Ág.

Flækingur í Garðinum

2008-06-05T18:30:00.002Z

Eins og ég nefndi í blogginu okkar hér í lok maí þá kom til okkar kona og tók útvarpsviðtal við okkur en það var flutt í útvarpsþættinum Flækingnum í dag kl. 16:13. Því miður gafst okkur ekki tími til að láta fólk vita af þessu en fyrir þá sem ekki heyrðu viðtalið og langar að hlusta á rausið í okkur Ara þá er hægt að hlusta á upptökur þáttarins á heimasíðu RÚV.Kv.Ág.

Sumargleði

2008-05-28T23:28:00.000Z

Tíminn líður óðfluga, maí er við það að verða búinn og júní er hérna rétt handan við hornið. Sumarið er komið, það finnur maður svo vel á dögum eins og þessum í dag… alveg yndislegt veður með ilmi af sumri… oh svo notalegt :-). Þegar ég fór og sótti Maríu í leikskólann seinnipartinn í dag og þegar við gengum niður veginn að Gauksstöðum þá var svo fallegt heim að horfa; Túnin fagurgræn, þvotturinn blakti á snúrunum og vegkanturinn var heiðgulur af fíflum… þetta var eitthvað svo mikil sveit. Ég elska sveitina okkar.

Svavar er ennþá lasinn með hita og hálsbólgu. Vonandi fer hann að ná sér og við krossum fingurna hérna að enginn annar leggist. Við meigum eiginlega ekki við meiri veikindum því við Ari erum hlaðin verkefnum og alltaf bætist við verkefnalistann okkar. Það er erfitt að segja nei þegar maður þarf á tekjunum að halda. Eins og ég nefndi áðan þá er júní alveg á næsta leyti og við keppumst við að klára það sem klára þarf fyrir mánaðarmótin en það þýðir að við erum búin að vera að vinnu öll kvöld líka. Júní á einnig eftir að vera frekar hlaðinn og vildi ég óska þess að við Ari gætum klónað okkur því ekki veitti okkur af aukahöndum hérna. Ekki nóg með að hönnunarverkefni bíði okkar heldur erum við líka starfsmenn tveggja nefnda hérna í bænum, annarsvegar vegna Sólseturshátíðarinnar hérna í Garðinum sem verður 27. – 29. júní í sumar og hins vegar 100 ára nefndar Sveitarfélagsins en bæjarfélagið okkar verður hundrað ára núna 15. júní. Ekki má heldur gleyma minjagripunum en núna er allt farið á fullt og pantanir streyma hérna reglulega inn. Gaman af þessu :-) Vona samt að við klárum ekki alveg út af „rafgeymunum“ okkar. Auk þessa alls þá erum við í dágóðan tíma (c.a. 1 ár) búin að ætla að opna litla galleríið okkar hérna í vinnustofunni úti og er þetta alveg að hafast, við þurfum bara að taka góða törn í að þrífa betur þarna úti og snyrta aðeins umhverfið hérna við húsin hjá okkur svo fólki sé bjóðandi hérna heim í hlað. Semsagt okkur Ara leiðist ekki þessa dagana frekar en áður, spurning samt hvort krökkunum fer ekki að leiðast það hve upptekin við erum alltaf. Það væri betra ef við gætum sinnt þeim aðeins meira þessa dagana… stundum vilja þau leika við einhvern annan en bara hvort við annað… stundum líka við mömmu og pabba. Við stefnum samt á að taka okkur svolítið frí með krökkunum í júlí og kannski eitthvað í ágúst líka.

Jæja, núna er alveg að koma miðnætti, enn er bjart úti og veðrið er alveg yndislegt. Hægur vindur SSA 2.8 m/sek og hiti um 11°C. Nú er kominn háttatími og tími til kominn að fara að hlaða batteríin. Ég ætla samt að bregða mér hérna aðeins útfyrir og anda að mér fersku lofti og njóta pínu augnabliksins á meðan ég tek inn þvottinn. Rölti kannski hérna aðeins niður að sjónum áður en ég hátta og hverf inn í draumaheiminn… hafið það gott og góða nótt! Kv.Ág.

Öðruvísi dagur

2008-05-26T14:18:00.002Z

Dagurinn í dag einnkennist af fundum og viðtölum. Núna í morgun kom til okkar kona, hún Elín Lilja Jónasdóttir og tók við okkur útvarpsviðtal en hún sér um þáttinn Flækinginn á Rás 1 í sumar ásamt Guðmundi Gunnarssyni. Eins og segir á heimasíðu Rúv þá er þátturinn á dagskrá á Rás 1 á hverjum virkum degi í sumar, á milli 16:13 og 17:00. „Flakkað er um landið og í hverjum þætti er tekinn fyrir ákveðinn staður, þorp eða eyja. Rætt er við fólkið sem þar býr til þess að draga upp eins konar mannlífsmynd af staðnum. Flækingur leitar að hvunndagshetjum á öllum aldri sem ekki er venjulega í forsvari fyrir sína heimabyggð. Við förum með viðmælendum okkar í vinnuna, út á sjó eða sækjum þá heim“. Hún Elín var mjög viðkunnanleg og skemmtileg kona og var reglulega gaman að spjalla við hana. Við vitum ekki ennþá hvenær viðtalið við okkur verður flutt en þættirnir byrja núna 2. júní.

Í dag bíða okkar Ara einir þrír fundir. Við verðum að vísu að skipta þeim á milli okkar því hann Svavar okkar er lasinn í dag, með hálsbólgu og hita :-(. Hann er sjaldan svona slappur skinnið litla. Hann var nú ekki til stórræðanna í morgun þannig hún María okkar var send í leikskólann þar sem við reiknuðum ekki með því að þau gætu haft ofan af fyrir hvoru öðru hérna heima í dag. Við Ari reynum auðvitað að sinna vinnunni eftir bestu getu þó við þurfum að hafa ofan af fyrir stráknum en við erum sem betur fer með þau forréttindi að vinna heima hjá okkur þannig við þurfum ekki að taka okkur frí. María sagðist nú vilja vera heima í dag og sofa eins og Svavar… æji, mig langaði nú ekkert að vera að senda hana burt… það kom mér samt á óvart hvað hún María var samt dugleg að fara í leikskólann í morgun, við gengum hér syngjandi út úr húsi… þó aðalega hún María, litli söngfuglinn, auðvitað. Vonandi gengur þessi pest fljótt yfir hérna á þessu heimili. Kv.Ág.

Sunnudagur

2008-05-26T14:14:00.007Z

Dagurinn í gær var fínn, fram eftir morgni dunduðum ég, Ari, Svavar og María okkur hérna heima við leik, tölvuleik og fleira. Við gleymdum okkur meira að segja og alltíeinu var klukkan bara langt gengin í ellefu og kominn tími á fótboltaæfingu. Nú var að hafa hraðar hendur, klæða sig (vorum ekki búin að því :-), greiða og fleira svo hægt væri að láta sjá sig úti. Í tilefni af degi barnsins sem var á sunnudaginn þá var haldinn sögustund og sungin lög hérna uppi á bæjarskrifstofum. Ég og María fórum þangað á meðan Ari fór með Svavar á fótboltaæfingu. Þetta var mjög notaleg stund sem við áttum þarna; Oddný bæjarstjóri las tvær sögur og krakkarnir sungu við undirleik frá Júlíu leikskólakennara á gítar og aldraður frændi hennar spilaði á fiðlu. Þetta var ferlega gaman. Það var líka gaman að fá að hitta fjölskylduna hennar Júlíu frá Kólimbíu. Þetta voru mamma hennar, pabbi, systir, frændi og frænka sem öll eru hér þessa dagana í heimsókn hjá henni.

Svavar dró James Robert með sér heim eftir fótboltaæfingu en hann er besti vinurinn hans Svavars. Þeir léku sér hér inni og úti frá 12:00 til 17:00. Pabbi hans og eldri bróðir kíktu líka í kaffi þegar James var sóttur. Þeir eru allir frá Nýja Sjálandi en móðir hans James er íslensk, James flutti til Íslands þegar hann var á öðru ári. Þeir Svavar og James ná rosalega vel saman, mjög góðir vinir þarna á ferð :-). Á meðan þeir félagarnir léku sér var María aðalega með Birnu og Heru. Við Ari vorum nær allan daginn í gær hérna úti á vinnustofu við að undirbúa gangsetninguna á galleríinu okkar sem við erum að reyna að opna núna í júní. Ari keyrði síðan Birnu og Heru heim til sín seint í gær. Alltaf gaman að hafa þær stelpurnar. Kv.Ág.

Vikurnar líða hratt

2008-05-24T18:32:00.000Z

Síðastliðin vika var náttúrulega geðveiki. Helgin var bara vinna og aftur vinna, frameftir öllu. Ekki mikið um frí eða skemmtun. Held að Svavar og María hafi nú ekki verið neitt sérstaklega ánægð með okkur þessa helgina. Annars eru þau alltaf dugleg þessar elskur.

Við höfðum ætlað okkur norður til Akureyrar þarna á fimmtudeginum 15. maí en vegna pantana hjá Lyng og verkefnum sem komu inn á borð hjá Hennar hátign, með litlum fyrirvara - verkefni sem þurfti að redda strax, þá urðum við að fresta för okkar norður. Leiðinlegt þar sem Svavari og Maríu var búið að hlakka gífurlega mikið til að heimsækja afa og ömmu í Jörvabyggð. Það verður bara að bíða betri tíma eins og vanalega. Ykkur að segja þá er þetta nú ekki í fyrsta skiptið sem við sláum af ferð norður… þetta er varla fyndið… samt er þetta brandari sem er farinn að ganga hjá fjölskyldunni. Þetta kemur engum lengur á óvart… liðið á Gauksstöðum er alltaf svo bissí.

Vikan var frekar erfið og stressandi líka… þannig að nú þegar ný helgi gengur í garð þá erum við Ari frekar púnkteruð (eins og sagt er fyrir norðan :-). Það þýðir samt ekki að sitja heima að lesa því verkefni helgarinnar eru alltof mörg og efast ég um að við komumst yfir þau öll. Auðvitað ætlum við okkur að slaka eitthvað á líka. Í morgun byrjuðum við á helgarhreingerningunni sem aldrei var framkvæmd um síðustu helgi, það er tildæmis mjög slakandi og hugarhreinsandi líka :-). Við fengum kærkomna gesti í dag, Svavar tengdapabba og hana Huldu sem kipptu Birnu og Heru með sér úr Reykjavík. Það var fínt að þurfa ekki að skutlast eftir stelpunum. Þær verða hérna í dag hjá okkur en stoppa bara stutt núna yfir helgina. Þær eru búnar í prófunum og stóðu sig bara vel. Til hamingju með þetta stelpur! Þær byrja síðan í sumarvinnunni núna í júní.

Fyrrihluta vikunnar var útskriftarferð hjá skólahópnum á Gefnarborg. Svavar er einn af sextán krökkum sem eru að byrja í Gerðaskóla í haust en það er óvenjulega lítill hópur þar sem undanfarin ár hafa krakkarnir verið um þrjátíu í tveimur bekkjum. Útskriftarferðin heppnaðist mjög vel. Þau fóru í Kölku og sáu hvernig ruslið er endurunnið, fóru í heimsókn í nýjan leikskóla á Háskólavöllum, borðuðu á KFC, fóru á hestbak og enduðu síðan í veislu á Gefnarborg… Svavar var mjög ánæðgður og kátur með þetta allt og jafnframt mjög þreyttur um kvöldið :-).

Í kvöld er júróvisionkvöld og stefnir fjölskyldan á að hafa hérna lítið júróvisionpartý og krakkarnir eru með það alveg á hreinu að þau vilja fá eitthvað góðgæti líka; súkkulaðiís, snakk, popp og nammi var þeirra tillaga :-). Hafið það sem allra best og áfram Ísland! Kv.Ág.

Sprækir kettlingar á Gauksstöðum

2008-05-17T23:22:00.004Z

Myndablogg: ÚTI AÐ LEIKA

2008-05-17T00:18:00.003Z

Í veðurblíðunni

2008-05-17T00:15:00.002Z

Veðrið hefur leikið við okkur Garðbúa undanfarna daga sem og aðra landsmenn að mér skilst. Svavar og María eru búin að leika sér öllum stundum úti bæði hér heima og þó sérstaklega í leikskólanum en þar hafa krakkarnir á bestu dögunum vart komið inn nema til að borða og þessháttar. Það hefur þó náð að rigna eina tvo daga sem reddar gróðrinum gjörsamlega og er grassprettan á túninu okkar komin á fullt. Grasið er farið að skríða og mynda frjókorn sem eru ekki gleðifregnir fyrir þá sem eru með frjóofnæmi eins og hann Ara minn og hana Birnu okkar. Við höfum blessunarlega verið laus (sjö, níu, þrettán!) við fuglaflónna þetta vorið sennilega afþví guli strætóinn (hann Golíat okkar) er ennþá týndur en hann var vanur að bjóða flónum heim til að bíta húsfreyjuna á Gauksstöðum en það hefur fregnast hve girnileg hún er ;-).

Svavar fór í vorskólann í Gerðaskóla í tvo daga í síðustu viku og tvo tíma í senn. Þessir dagar eiga að auðvelda verðandi 1. bekkingum að aðlagast skólalífinu og koma í veg fyrir kvíða fyrir komandi skólagöngu. Þetta var mjög spennandi fyrir hann Svavar okkar og líkaði honum bara vel í skólanum. Hann spurði okkur meira að segja hvenær skólinn myndi síðan byrja… við sögðum næsta haust… þá sagði hann „ég vil að hann byrji strax“. Vonandi að þetta sé merki um hvað verða vill næsta haust.

Undanfarna daga höfum við Ari ekki getað notið veðursins sem skildi sökum anna. Ekki það að við séum að kvarta yfir þeim verkefnum sem við höfum á borðinu… það er bara þannig að íslenska sumarið er svo stutt að mann langar helst að henda frá sér öllu þegar veðrið er þetta gott. Það bara gengur auðvitað ekki og það líðst ekkert kæruleysi þessa dagana. Við höfum verið að vinna fram eftir kvöldi undanfarið og meira að segja vaknaði Ari upp fyrir allar aldir í dag og byrjaði að vinna. Þegar ég vaknaði rétt fyrir sjö í morgun var Ari löngu kominn á fætur. Sennilega hefur hinn fagri fuglasöngur vakið hann þennan morguninn eins og mig.

Vonandi verður áframhald á þessu yndislega veðri, gaman að finna hvað sumarið er að sveipa allt gleðibirtu þessa dagana. Njótið veðurblíðunnar ef hún endist. Kv.Ág.

Afmæliskveðjur

2008-05-17T00:14:00.002Z

Þórarinn Friðrik Gylfason vinur okkar átti afmæli þann 13. maí síðastliðinn og Ida Eir dóttir Einars bróðurs átti afmæli þann 15. maí. Við viljum óska afmælisbörnunum innilega til hamingju. Afmæliskveðjur frá okkur á Gauksstöðum. Kv.Ág.

FTCH Tasco Rouble of Bedgebrook

2008-05-12T14:29:00.004Z

Þetta er alveg geggjaður hundur. Hann er meistari í Bretlandi og þykir afspyrnu góður. Liturinn er ekki til að skemma fyrir þó að hann skipti svo sem ekki máli. Þetta kallast á ensku Fox red, gæti heitið Ref rauður á því ylhýra. Þetta telst reyndar vera gulur litur á labbanum en það eru þrír litir viðurkenndir á honum, svartur, brúnn og gulur. Guli liturinn getur verið frá nánast hvítum yfir í svona rauðan lit.

Yndisleg helgi

2008-05-12T11:58:00.001Z

Jæja, í dag er einn „frídagur“ enn. Svona langar helgar eru ferlega góðar :-). Gott að þurfa ekki að rífa sig upp í stressi og þeytast inn í annir dagsins, að geta gírað sig svolítið niður og farið á þægilegri hraða inn í daginn. Undanfarnir tveir dagar eru búnir að vera yndislegir. Laugardagurinn var frídagur í vinnunni hjá okkur. Við tókum þessa venjulegu helgarhreingerningu sem að vísu dróst svolítið á langinn þar sem við fórum í gegnum dótið hjá krökkunum, hentum pappaumbúðum o.fl. sem þau voru búin að sanka að sér í „bollastellaleik“ eins og þau kalla leikinn. Einnig settum við töluvert af dóti í geymslu svona aðeins til að rýmka til hérna… hefðum alveg mátt setja eitthvað fleira í geymslu en Svavar stóð vörðinn og tók það ekki í mál.

Eftir tiltektina inni fórum við út í veðurblíðuna og fórum í Kölku með tvær fullar kerrur af rusli sem við hreinsuðum hérna upp í fjörunni um daginn. Enn er af nógu að taka og vonandi klárum við þetta fljótlega. Við hreinsuðum síðan upp ýmislegt smárusl og gamlan njóla og þessháttar hérna við húsið hjá okkur. Við þessa tiltekt fengum við líka að hlusta á þessa fínu tónlist sem ómaði hérna um allt því það var nefnilega brúðkaupsveisla í slysavarnarhúsunum hérna við hliðina á okkur… svaka stuð þar. Krakkarnir léku sér með bollarstell og fötur hérna úti á gangstétt, söfnuðu ánamöðkum eða „ormum eins og þau kalla þá. Svona nutum við veðurblíðunnar fram eftir öllu, rétt skruppum inn til að borða og svo út aftur. Ég átti í mestu erfiðleikum við að ná krökkunum inn því veðrið var svo gott og sólin skein þannig að það var sko ekki að koma nótt í hugum barnanna. Rúmlega níu um kvöldið kom ég þeim loksins inn og þetta kvöld sofnuðu þau kát og þreytt :-).

Hvítasunnudagur gekk síðan í garð með rigningu og roki… oh, hvar var veðurblíða gærdagsins? Morgninn fór í vinnu hjá okkur Ara og við fórum eiginlega ekkert út úr húsi í gær nema þá auðvitað Ari sem sinnti hundunum okkar og grillaði um kvöldið. Við fengum nefnilega góða gesti í heimsókn. Þetta voru Þórarinn bróðir, Olga konan hans og Kristín dóttir þeirra. Með þeim voru Jörn og Nick frá Þýskalandi en þeir dvelja hjá þeim í Úthlíðinni þessa dagana. Gaman að kynnast þeim og Nick náði bara ágætlega saman með Svavari. Það var mikið fjör hjá krökkunum og svo auðvitað hjá okkur hinum eldri líka. Þóarinn og Olga! Takk kærlega fyrir innlitið. Þetta var mjög skemmtileg stund sem við áttum saman hérna í gær og takk fyrir Olga að koma með þína gesti til okkar. Þetta eru yfirleitt okkar skemmtilegustu stundir að taka á móti gestum hérna á Gauksstöðum.

Í dag er síðan annar í Hvítasunnu og spurning hvað verður úr þessum degi. Við þurfum eitthvað að vinna og svo veit ég ekki meir… aldrei að vita hvað dagurinn ber í skauti sér. Eigið góðan dag og njótið þess sem hann gefur ykkur :-). Kv.Ág.

Gleðilega hátíð!

2008-05-11T23:50:00.004Z

Í dag er Hvítasunnudagur og kallast þessi helgi Hvítasunnuhelgin. En hvers vegna er haldið upp á Hvítasunnudag, hvað er sérstakt við þennan dag? Ég fór á vef kirkjunnar og komst að eftirfarandi:

Hvítasunnan er þriðja stórhátíð kristninnar. Með hvítasunnuhátíðinni lýkur páskatímanum. Nú eru liðnar sjö vikur frá páskum, og fimmtíu dagar. Af þeirri ástæðu ber hvítasunnan á mörgum erlendum tungum nafn sem dregið er af gríska orðinu pentecosté (hinn fimmtugasti). Eins og páskahátíðin á einnig hvítasunnan fyrirrennara í hátíðahaldi Ísraels. Hátíðin sem haldin er á þessum tíma að sið gyðinganna er einskonar uppskeruhátíð. Hún er þakkarhátíð fyrir fyrstu kornuppskeruna. Þess var jafnframt minnst þegar lýður Guðs hafði móttekið lögmálið á Sínaí. Hátíðin er því einskonar sáttmálahátíð.

Kristnir menn minnast á hvítasunnu einnig hins nýja sáttmála náðar og kærleika, þegar heilagur andi er sendur kristnum lýð. Hvítasunna er stofndagur kirkjunnar, og einskonar vígsludagur hinnar almennu kirkju sem Guð gefur í Jesú Kristi. Með því að postularnir töluðu á tungum framandi þjóða er heilagur andi kom yfir þá á hinni fyrstu hvítasunnuhátíð, og fengu skilaboð um að fara út um allan heim og djörfung til að predika, þá hefur kirkjan einnig kallað þetta uppskeruhátíð Krists. Frásögnin í öðrum kafla Postulasögunnar af atburðum hvítasunnudagsins lýsir tilefni dagsins best. Lesa má í fornum textum kirkjunnar að frá hinni fyrstu hvítasunnu, þegar Jesús Kristur efnir fyrirheitið um að Guð muni senda heilagan anda yfir þau sem trúa, þá megi orða það svo að eins og kirkjan er líkami Krists á jörðu þá sé heilagur andi sálin í þeim líkama. Heilagur andi lífgar og leiðir kirkjuna, kennir henni og varðveitir hana frá villu, eins og líka sérhvert þeirra sem játast Jesú Kristi.

Þá hafið þið það :-) Ég viðurkenni það fúslega að þetta vissi ég bara ekki. Vonandi hafið þið átt góðan dag hvort sem þið hafið ræktað Guð sérstaklega eða ekki. Og svo auðvitað vil ég óska öllum mæðrum innilega til hamingju með daginn, sérstaklega þó móður minni. Kv.Ág.

Lífið er gott

2008-05-09T17:52:00.006Z

Fallegar hugsanir, falleg orð, góðar tilfinningar og góðar gjörðir… þetta er allt eitthvað sem gott er að temja sér því þá verður lífið miklu skemmtilegra og betra :-). Því eins og Megas kvað „Ef þú brosir framan í heiminn, þá brosir heimurinn framan í þig“. Maður þarf bara stundum að minna sjálfan sig á að brosa og vera glaður. Það getur samt verið heilmikil vinna að standa gegn öllu því neikvæða sem dynur á okkur alla daga. Eigið góða helgi framundan og munið að BROSA! Kv.Ág.

Fullorðin er hún

2008-05-09T17:52:00.005Z

Jæja nú er hún Birna okkar 18 ára í dag sem er mjög skrítið þar sem mér finnst ég ekki vera nema svona 29. Elsku Birna okkar, til hamingju með daginn :-). Nú ert þú orðin sjálfráða og þá er erfitt fyrir okkur að standa gegn vilja þínum (ekki það að það hafi reynt neitt á það). Mundu bara að maður uppsker það sem maður sáir og það er enginn annar en maður sjálfur sem ræður því hvort maður verður hamingjusamur eða ekki. Ég held því fram að maður á að láta drauma sína rætast, allavega að reyna það :-). Við elskum þig öllsömul, litla fjölskyldan þín á Gauksstöðum, pabbi, Ágústa, Svavar og María. Kv.Ág.

Hvar ertu Golíat minn?

2008-05-06T23:10:00.003Z

Æji, þetta er orðið frekar erfitt og maður er farinn að missa alla von um að hann Golíat okkar finnist aftur. Ég vil biðja ykkur samt um að hafa augun opin og líta tvisvar ef þið sjáið gulan, stóran og loðinn kött... þetta gæti verið hann Golíat okkar sem er þá annaðhvort fluttur að heiman eða ratar ekki heim aftur. Hérna eru myndir af gaurnum, leggið þær á minnið. Ef þið sjáið Golíat eða vitið hvar hann er niðurkominn endilega látið okkur þá vita í síma 862 6063 eða 862 7063. Það er erfitt að vita ekki hvar hann er. Kv.Ág.

Myndablogg: TILTEKT Í RIGNINGUNNI

2008-05-05T16:56:00.004Z

Gestagangur á Gauksstöðum

2008-05-05T00:02:00.003Z

Eins og ég nefndi í fyrra bloggi þá fengum við gesti hingað í dag (sunnudag). Fyrst komu þeir Guðjón Ingi vinur okkar og sonur hans Árni Þór og kíktu á okkur. Krakkarnir léku sér saman og við hin spjölluðum. Rifjuðum upp gamla tíma á Akureyri og fleira (eins og svo oft áður… ekki rétt Ragga? :-). Alltaf gaman að hitta þá feðga og takk kærlega fyrir innlitið strákar! Við söknuðum þess auðvitað að hitta ekki Röggu líka en vonandi gefum við okkur tíma fljótlega til að kíkja á ykkur í Garðabæinn.

Litlu eftir að Guðjón og Árni yfirgáfu okkur kom hingað góð vinkona okkar hún Hildur Gylfa og með henni í för var hluti af fjölskyldunni hennar, Bjössi og dóttir þeirra Elma. Þau stöldruðu við hérna góða stund og Svavar og María léku við Elmu. Krakkarnir náðu bara mjög vel saman öllsömul og Elma var ekki alveg á því að fara heim þegar foreldrarnir vildu það. Þetta var skemmtileg stund sem við áttum saman hérna og vonandi hittumst við fljótlega aftur… spurning um góðan mat, gistingu og fleira kannski næst? Takk kærlega fyrir innlitið!

Á fyrsta maí fengum við líka gesti, það var Gunnar bróðir Ara, Steinunn konan hans og dóttir þeirra Kolbrún Þórhildur. Þau boðuðu komu sína deginum áður svo Ari gaf sér tíma og bakaði líka þessu fínu súkkulaðitertu handa þeim. Það var töluvert langt um liðið síðan þau komu síðast öll saman. Við áttum góða stund með þeim hérna og greinilegt að þær mæðgur eru miklar kisu-manneskjur enda eiga þau tvær læður heima. Takk kærlega fyrir innlitið… það er alltaf gott að fá góða gesti. Kv.Ág.

Úti í rigningunni

2008-05-04T23:22:00.003Z

Já, við ákváðum að drífa okkur bara út í rigninguna í morgun. Við klæddum okkur öll í regngalla og stígvel, vopnuð plastpokum og trukk með kerru... nú átti að taka aldeilis til hendinni og halda áfram við að hreinsa fjöruna okkar og túnin. Það var hellidemba og hægari vindur, fljótlega stytti þó upp og við Ari áttum góðar stundir hérna úti á túni fram yfir hádegið með Svavari og Maríu sem tóku virkan þátt í tiltektinni. Þvílíkt drasl sem við drógum upp hérna í fjörunni. Eftir hádegið fengum við gesti svo það var tekin pása. Við kíktum síðan upp á bæjarskrifstofur og fengum okkur kakó og vöfflur en umhverfisnefnd bæjarins bauð þeim sem tóku þátt í skipulagðri tiltekt undanfarna daga upp á kræsingarnar, mjög fínar vöfflur... nammi namm :-). Við héldum síðan áfram seinnipartinn en þá var farið að auka verulega í vindinn og krakkarnir orðnir svolítið þreyttir. Krakkarnir voru ótrúlega dugleg að hjálpa okkur í dag :-). Þau voru einnig mjög spennt yfir hlutunum sem komu í leitirnar í dag; nokkrar golfkúlur, „risa“ golfkúla, legokarl (vorum búin að finna annan um daginn) og ýmislegt glingur. Við höfðum það á orði að kannski þyrftum við ekkert að kaupa aftur dót handa þeim því hér væri alltaf hægt að finna einhverja hluti sem skemmtilegt væri að leika sér með. Við vorum auðvitað ánægð með dagsverkið og ánægð með að hafa drifið okkur út í dag því það er bara hressandi að vera úti í rigningunni. Kv.Ág.

Sumarið er greinilega handan við hornið

2008-05-03T14:42:00.002Z

Það eru fleira en fuglarnir sem boða komu sumarsins. Í dag má sjá hérna við hliðina á okkur, hjá húsum slysavarnarfélagsins, fullt af hjólhýsum, fellihýsum, tjaldvögnum og húsbílum. Í dag er verið að taka vagnana úr geymslu. Þetta eru tveir dagar á ári sem þetta er svona; Þegar fólk kemur með vagnana sína á haustin og svo þegar þeir eru sóttir í byrjun sumars. Þegar við fórum út í morgun til að fara með krakkana á fótboltaæfingu, þá sagði hann Svavar okkar „Sjáið þið þarna er kerrupartý“ Hann getur verið svo skondinn strákurinn :-). María kom svo út stuttu seinna og sagði þegar hún sá herlegheitin „ Mamma, nú er sumarið komið“. Æji þau geta nú verið svo næm þessir krakkagríslingar… hitta svona naglann beint á höfuðið… auðvitað er þetta eitt af merkjunum um að sumarið er handan við hornið. Hafið það gott í dag! Kv. Ág.

Dirrindí

2008-05-03T00:02:00.003Z

Nú þegar voraði og sumarið gekk í Garð byrjuðu fuglarnir að syngja af miklum eldmóð. Lóan syngur sínum fallega söng hér í túninu hjá okkur en hún hópast hér saman alltaf í byrjun sumars. Tjaldurinn lætur sig ekki vanta og fáum við að njóta hljóðanna í honum sem geta verið mjög hávær þegar þeir keppa um maka. Þau ár sem við höfum búið hérna er alltaf eitt par hérna á túninu okkar og karlfuglarnir eru oft tveir til þrír að „berjast“ um kvenfuglinn. Þeir sýna sig og láta öllum illum látum, furðulegt háttarlag og það sem ég skil ekki hvað hún sér við þessa vitleysingja sem hlaupa gargandi um túnið með vængina í eftirdragi… frekar fyndið að sjá. Hér í túninu okkar er líka eitt spóapar en hljóðið í þeim er eitt af einkennishljóðum sumarsins. Hrossagaukurinn er hérna líka og það líður örugglega ekki langur tími þar til við förum að heyra hann hneggja þegar hann tekur sínar flottu dýfur. Síðan eru það mismunandi fuglar sem hafa viðkomu í gulvíðinum hérna í garðinum hjá okkur, um daginn var þar þrastarpar, þar áður auðnutittlingur sem er ferlega fallegur með lítinn rauðan topp á höfðinu. Fyrir fáum dögum sáum við síðan þúfutittling sem Ari náði mynd af eins og sjá má hérna að ofan en hann syngur mjög fallega. Það getur verið notalegt að sitja hérna úti og hlusta á sönginn í öllum þessum fuglum og heyra mávahláturinn óma. Ég elska þetta :-). Kv. Ág.

Nokkrum sokkum síðar…

2008-05-01T23:33:00.004Z

Já, tíminn líður, sokkunum fækkar og nú fer að koma tími á að fylla á sokkaskúffuna aftur. Þið haldið sjálfsagt að nú sé ég endanlega orðin rugluð en þeir sem fylgst hafa með blogginu okkar vita hvað ég er að tala um :-). Nú er sumarið komið samkvæmt dagatalinu og meðan ég man – gleðilegt sumar öllsömul! – Það er samt einhvernveginn ekki alveg komið sumar, það rembist samt eins og rjúpa við staurinn og manni líður einhvernveginn þannig að sumarið sé nú bara hérna rétt handan við hornið. Við höfum fengið ágætis daga hérna undanfarið að vísu hefur þessi vika verið mjög vindasöm hérna og finnst okkur nú vera komið alveg nóg. Það blés nú alveg nóg í janúar síðastliðnum var það ekki annars?

Vorinu fylgir vorhreingerning… þessa dagana er í gangi hérna í Garðinum, eins og á mörgum öðrum stöðum á landinu, hreinsunardagar. Þegar veður hefur verið gott höfum við tekið aðeins til hendinni og hreinsað landið okkar af þeim „reka“ sem sjórinn færði okkur hérna í vetur; eyrnapinna-stangir í þúsundatali, forhlöð úr haglaskotum, ýmislegt plastrusl s.s. netakúlur, umbúðir o.fl. Einnig timbur, vörubretti, jólatré, fiskikassa og ýmislegt fleira sem sjórinn hefur greinilega þurft að taka við einhverju áður. Það hafa allir gott af því að hreinsa fjörur annað slagið, það kennir okkur hvernig umgangast á náttúruna. Plast er greinilega mikið eitur fyrir náttúruna því það brotnar ekki niður svo auðveldlega og er greinilega mjög mengandi. Nóg um það… við fengum mikið magn af þara hérna upp á tún líka, við erum búin að koma megninu af honum í góðan safnhaug og tína úr honum ruslið. Enn eigum við eftir að moka töluverðum þara af landareigninni og það gerum við vonandi núna fljótlega þegar hægir vindinn og við fáum góðan þurrk. Við fengum góða hjálp við tiltektina hjá móður minni og föður þegar þau dvöldu hjá okkur um daginn… þau héldu okkur við efnið :-).

Heilsan hefur verið bara með ágætum hjá fjölskyldunni fyrir utan, kvef, magapestar og flensu… svona þetta vanalega… samt engir ofurskammtar af veikindum. Við Ari höfum verið að æfa aðeins í ræktinni hérna í íþrótthúsinu í Garðinum. Höfum farið þá í hádeginu og æft sem hefur verið frábært og heldur allri vöðvabólgu í skefjum.

Einhverjir hafa haft það á orði við okkur að bloggið okkar sé farið að breytast í kattarblogg, sennilega rétt þar sem við höfum verið svolítið upptekin af köttunum undanfarið. Sólbjört gaut fjórum kettlingum fyrir rúmum fjórum vikum og gekk þremur þeirra vel að sjúga mömmu sína en ein læðan tók ekki spenann almennilega og höfum við þurft að gefa henni pela… já, við erum komin með pelabarn og höfum meira að segja þurft að vakna til hennar á næturna. Það verður ánægjulegt þegar hún hættir að þurfa mjólkina og fer að borða kattarmat. Við höfum haft miklar áhyggjur af honum Golíati okkar en hann er enn týndur og hefur verið það núna í tæpa tvo mánuði. Þetta er ekki bjart, annað hvort er hann fluttur að heiman og er kominn með nýtt heimili einhversstaðar eða að hann er einfaldlega dauður :-(. Við vonumst þó alltaf til þess að hann birtist hérna einn daginn, frekar óþægilegt að vita ekki hvar hann er niðurkominn.

Mamma og pabbi voru hérna hjá okkur í rétt rúma viku og fóru heim um síðustu helgi. Pabbi hjálpaði okkur á vinnustofunni úti eins og svo oft áður en þetta er í þriðja skiptið síðan um áramót sem hann kemur til okkar og mamma hefur komið tvisvar. Mamma hefur hjálpað okkur mikið líka sérstaklega við að taka aðeins til hérna í garðinum hjá okkur ásamt því að tína rusl og raka þara svo eitthvað sé nefnt. Elsku mamma og pabbi, takk fyrir alla hjálpina… það er alltaf gott að hafa ykkur, Svavar og María eru líka ferlega hamingjusöm með að hafa ykkur hérna. Svavar er alltaf að rifja upp sögur af sér og afa sínum í ruslaleiðangri með hjólbörurnar og boltaleikina sem þeir fóru í, þetta var mikið ævintýri fyrir hann :-).

Ýmsir hafa átt afmæli undanfarið. Kristín litla frænka, dóttir Þórarins bróður varð þriggja ára þann 20. Apríl. Við fórum í afmælið til hennar og skemmtum okkur mjög vel. Hann Svavar okkar átti einn góðan þar eins og svo oft áður. Málið er að María og Kristín voru að kíta eitthvað… þá segir Svavar eitthvað á þessa leið: „Nú eru þið báðar orðnar þriggja ára og eigið þá ekki að rífast svona“… hann er svo mikill spekingur stundum. Fleiri áttu afmæli í síðasta mánuði, ektamaðurinn minn hann Ari átti afmæli þann 22. ásamt móður minni og héldum við upp á það hér með góðum mat og komu Þórarinn, Olga og Kristín hingað og samglöddust með okkur… mjög skemmtilegt kvöld. Tóta vinkona okkar átti afmæli þann 26. og dóttir hennar Guðný Björk þann 25. og Óðinn Andri hennar Kötu, systurdóttur hans Ara, átti afmæli þann 30. Vil ég senda afmælisbörnunum öllum innilegar afmæliskveðjur frá okkur fjölskyldunni hérna á Gauksstöðum.

Það er varla hægt að senda frá sér blogg núna án þess að tala aðeins um vinnuna líka. Það er búið að vera bara töluvert mikið að gera í hönnuninni og nú eru að berast pantanir á vörunum okkar hjá Lyng, þar er allt að fara á fullt. Semsagt alltaf nóg að gera hjá okkur. Ýmis verk bíða þess einnig að vera unnin hérna í húsinu okkar bæði að utan sem innan og verðum við að nýta okkur þann tíma sem gefst fyrir utan dagvinnuna í þau verk. Við erum að keppast við að undirbúa það að opna lítið vinnustofugallerí hérna úti í vinnustofu hjá okkur þessa dagana og vonandi getum við opnað þetta í einhverri mynd núna í maí.

Þetta var svona sýnishorn af því sem hefur verið að gerast hjá okkur undanfarið… vonandi gef ég mér oftar tíma til að skrifa eitthvað hérna inn. Þó ekki væri nema sjálfrar minnar vegna en þetta blogg er fyrir mér einhverskonar dagbók. Það er mjög gott að horfa yfir farinn veg og sjá hvað maður hefur verið að bralla, maður gerir nefnilega töluvert þó oft finnist manni sem maður komist bara ekki yfir neitt af því sem mann langar að gera… en ég hef komist að því að ég er alltaf að gera eitthvað skemmtilegt… þessar litlu stundir með krökkunum og Ara, þetta eru mínar bestu stundir… litlu kraftaverkin sem ég upplifi alla daga :-).

Nú læt ég þetta nægja og ef þið hafið komist í gegnum þessa færslu án þess að gefast upp þá vil ég bjóða ykkur góðrar nætur og vona að þið hafið það gott. Knús til ykkar – kv. Ág.

Kettlingarnir 4 vikna

2008-04-28T16:35:00.009Z

Nú eru kettlingarnir orðnir fjögurra vikna og farnir að kanna heiminn. Þeir hlaupa orðið hér um allt og því eins gott að gá vel að því hvar maður stígur niður fæti. Það er gaman að fylgjast með þeim og í raun ótrúlegt hve snemma karakterinn kemur í ljós :-). Fólk er búið að sýna kettlingunum mikinn áhuga og höfum við fengið margar fyrirspurnir. Við erum búin að lofa tveimur sem eru því fráteknir. Hér koma nýjar myndir af þeim.

Týr frá Gauksstöðum - frátekinn

Björk frá Gauksstöðum - frátekin

Ýr frá Gauksstöðum - frátekin

Sól frá Gauksstöðum - frátekin

Í öfugri röð

2008-04-16T13:07:00.004Z

Fékk þennan texta hjá henni Margréti Kröyer vinkonu minni, en hún á einmitt afmæli í dag :-) Elsku Magga til hamingju með daginn. Sjáumst vonandi sem fyrst.

Next Life" by Woody Allen
In my next life I want to live my life backwards. You start out dead and get that out of the way. Then you wake up in an old people's home feeling better every day. You get kicked out for being too healthy, go collect your pension, and then when you start work, you get a gold watch and a party on your first day. You work for 40 years until you're young enough to enjoy your retirement. You party, drink alcohol, and are generally promiscuous, then you are ready for high school. You then go to primary school, you become a kid, you play. You have no responsibilities, you become a baby until you are born. And then you spend your last 9 months floating in luxurious spa-like conditions with central heating and room service on tap, larger quarters every day and then Voila! You finish off as an orgasm! I rest my case.

Kv. Ág.

Nýjar myndir af kettlingunum

2008-04-14T21:59:00.011Z

Nú hafa kettlingarnir allir fengið nafn og sóttum við nöfnin í rúnirnar sjálfar sem eru allt saman kraftmiklar og góðar rúnir.

Týr frá Gauksstöðum

Björk frá Gauksstöðum

Ýr frá Gauksstöðum

Sól frá Gauksstöðum

Afmæliskveðja

2008-04-03T21:41:00.003Z

Hann Dalli vinur okkar á afmæli í dag :-). Kæri vinur, til hamingju með daginn. Vonandi hefur þú átt góðan dag í dag, sjáumst vonandi sem fyrst. Afmæliskveðja frá okkur garðálfunum. Kv.Ág.

1. apríl

2008-04-01T19:03:00.002Z

Í dag er fyrsti apríl ágæta fólk. Þeir sem koma hér inn til að líta á einhver furður hafa þá líklega „hlaupið“ fyrsta apríl. Ha ha.

Kettlingar á Gauksstöðum

2008-03-31T18:51:00.005Z

Í dag gaut hún Sólbjört okkar fjórum kettlingum. Þetta er fyrsta gotið hennar Sólbjartar og hún stóð sig með prýði :-). Þetta gekk allt saman mjög vel hjá henni... og var bara eins og hún hefði gert þetta oft áður. Fyrsti kettlingurinn kom í heiminn kl. 10:40 í morgun og sá síðasti kl. 12:43. Móður og afkvæmum heilsast vel. Þetta eru þrjár læður, allar tortie litar (þrír litir; svartur, hvítur og gulur) og að okkur sýnist einn högni sem er svartbröndóttur á litinn. Þeir eru svo litlir greyin að það er erfitt að ná góðri og lýsandi mynd af þeim. Þessar myndir tókum við núna seinni partinn og þið fáið að sjá síðan fleiri þegar kettlingarnir hafa braggast meira og verða komnir með sjónina, þeir breytast svo mikið þegar þeir opna augun :-). Því miður hefur pabbinn ekki látið sjá sig ennþá... vonandi labbar hann sér hingað einn daginn. Kv.Ág.

Til hamingju bróðir bróðir :-)

2008-03-27T15:14:00.007Z

Arkitektarnir, bræður mínir Þórarinn og Einar Bjarki, fengu Norsku Byggingarlistaverðlaunin í ár. Í Noregi er hefð fyrir því að veita þeim byggingum verðlaun sem hafa staðist tímans tönn í að minnsta kosti 5 ár og teljast til tímamótaverka í norskri byggingarlist.

Gaman að þeir skuli báðir fá þessi verðlaun á sama tíma en þeir fá verðlaunin fyrir sína hvora bygginguna.

Einar Bjarki fær verðlaunin sem einn aðalhönnuða að einstaklega fallegri kirkju sem stendur í skógi rétt fyrir utan Osló „Mortensrud kirke“. Einar vann að þessari byggingu hjá Jensen og Skodvin Arkitektkontor AS í Osló. http://jsa.no/. Einar Bjarki býr enn í Noregi og vinnur hjá Arkitektur N sem er fagtímarit um arkitektur http://www.arkitektur.no/. Hann vinnur líka sem sjálfstætt starfandi arkitekt.

Þóarinn fær verðlaunin aftur á móti sem aðalhönnuður Norsku Vöruhallarinnar eða Norges Varemesse hjá Arne Henriksen Arkitekter AS. http://www.ah-arkitekter.no/ en Þórarinn vann hjá Arne í 6 ár í Oslo eftir að hann lauk námi í arkitektur. Gamli vinnuveitandinn hann Arne býður Þórarni til Oslóar til að hann geti verið viðstaddur verðlaunaafhendinguna þann 3. apríl næstkomandi. Þórarinn vinnur hjá Batteríinu arkitektar í Hafnarfirði. http://www.arkitekt.is/.

Kæru bræður til hamingju með þessa viðurkenningu! Þið eruð auðvitað langbestu arkitektarnir :-) ásamt auðvitað mákonunum mínum tveimur þeim Olgu og Liv ;-). Til lukku!!! Ég er stolt af ykkur. Kv.Ág.

Hefur þú séð Golíat?

2008-03-25T20:44:00.005Z

Hann Golíat okkar, sem er norskur skógarköttur, er týndur og er hans nú sárt saknað. Golíat fór heiman frá sér fyrir um hálfum mánuði síðan og hefur ekki sést síðan. Hann á það til að skreppa stundum að heiman í nokkra daga en hann hefur aldrei verið þetta lengi í burtu áður.

Golíat er stór, gulbröndöttur, síðhærður og töluvert hvítur á fótum og maga. Golíat kemur ekki endilega þegar kallað er á hann nema þá hann sé innandyra hér heima. Því gæti hann virkað á einhverja sem villiköttur. Hann var ekki með neina hálsól þegar hann hvarf en hann er örmerktur.

Ef þú hefur séð til ferða hans síðan 10. mars, veist hvar hann er niðurkominn eða veist um einhverja sem gefa ókunnugum köttum að éta þá vinsamlegast hringið í okkur í síma 557 6061 eða 862 6063 (Ari eða Ágústa).

Sokkaskrímslið ógurlega

2008-03-13T09:57:00.003Z

Undarlegir hlutir hafa gerst hér á Gauksstöðum undanfarna mánuði. Sokkar heimilisfólksins sem og gesta hafa slitnað með óeðlilegum hraða svo að tær og hælar hafa staðið út úr plöggunum við litla hrifningu okkar. Svo rammt hefur kveðið að þessu að við höfðum það í flimtingum að hér væri á ferðinni einhverskonar sokkaskrímsli, lítið nagdýr sem er á ferðinni þegar viðkomandi fórnarlamb er óviðbúið og nagar gat á sokka svo að stórsér á. Þetta náði hámarki hér fyrir um þremur vikum síðan þegar gat kom á nýju sokkabuxurnar hans Svavars en þær voru einungis viku gamlar. Eins og gefur að skilja vorum við orðin frekar leið á að vera alltaf með sundurrifna sokka svo að þegar við hittum einn af arkitektunum í fjölskyldunni (þeir eru fjórir) þá barst þetta í tal og fannst honum þetta býsna merkilegt. Næst þegar hann kom síðan í heimsókn þá var hann með svarið. Hafiði heyrt talað um Pergo-sokka? Virkilega? Það er víst staðreynd að Pergo parket slítur sokkum með ógnarhraða og finnst okkur að sölumaðurinn hefði getað minnst á þetta þegar við keyptum parketið á sínum tíma. „Jæja, hér eru þá 120 fermetrar af parketi með 50 ára slitábyrgð. Vel á minnst, slitábyrgið gildir ekki á sokkum nema þeir séu með stálþráðum.

Lítil saga af Svavari

2008-03-13T09:20:00.004Z

Það eru orðnar til nokkrar góðar sögur af honum Svavari okkar. Nú bættist ein við um síðustu helgi :-). Við vorum í Smáralindinni að útrétta smávegis og vorum á gangi fram hjá nýja kaffihúsi Kaffitárs sem er þarna úti á ganginum sjálfum. Uppi á borðinu er svona lítill auglýsingastandur úr pappír með auglýsingu frá Karlmennogkrabbamein.is og eins og flestir hafa tekið eftir undanfarið þá gengur auglýsingaherferðin út á það að það er teikningmyndafígúra með risastórar hendur sem fræðir fólk um krabbamein og hvernig megi greina einkenni o.s.frv. Þessi fígúra er alsber... bara á tippinu. Nóg með það en hann Svavar okkar hann segir svona þegar við göngum þarna fram hjá: „mamma, pabbi sjáið þið! Þarna er maðurinn með tippið!“. Hann var auðvitað að benda á lítið auglýsingaspjald en það vissu örugglega ekki hinir í kringum okkur. Ég held það hafi samt enginn staðið nákvæmlega í sömu línu og hann Svavar benti en þetta mátti misskiljast. Þessi börn, þau eru svo æðisleg. Við höldum áfram að safna svona augnablikum áfram og vonandi eiga þau eftir að verða mörg í viðbót :-). Kv.Ág.

Mama Mia

2008-02-29T16:28:00.005Z

Mér finnst þessi alltaf æðisleg!

Velkomin í heiminn litla frænka

2008-02-29T15:30:00.004Z

Í morgun kom í heiminn lítil prinsessa, hún fékk nafnið Maia Katrín og býr í henni stóru Ameríku. Þessi litla prinsessa er annað barnabarn hennar Kristlaugar systur Ara. Elsku Gerður og Chris til hamingju með frumburðinn og gangi ykkur vel. Elsku Kristlaug og Hjölli til hamingju með ömmu og afabarnið. Við hlökkum til að sjá myndir af litlu prinsessunni sem er víst með svart hár. Kveðja frá okkur öllum á Gauksstöðum; Ari, Ágústa, Svavar Axel, María Elísa, Birna Ósk og Hera Björt.

Myndablogg: FAÐMLAG FRÁ GOLÍATI

2008-02-24T10:41:00.003Z

Bros til ykkar

2008-02-21T10:33:00.002Z

Gengið í mjög svo fallegu veðri

2008-02-21T10:15:00.004Z

Núna áðan var NA átt og tæpir 3 m/sek og hiti um 0.2°C. Við Ari fórum út áðan og fengum okkur góðan heilsubótargöngutúr í björtu og fallegu veðrinu. Þetta var alveg yndislegt og gott start á annars annasömum degi :-). Því miður verður þetta ekki svona áfram því á næstu dögum er spáð umhleypingum hér sunnanlands. Hafið það gott í dag. Kv.Ág.

Dave Allen

2008-02-15T13:52:00.001Z

Munið þið eftir þessum snillingi?

Brandari í lok viku :-)

2008-02-15T09:49:00.004Z

Þennan brandara fann í flakki mínu um bloggheima en ég veit ekki hver höfundurinn er:

Í þorpi einu birtist einu sinni maður sem kvaðst vilja kaupa apa af þorpsbúum á 1000 krónur stykkið. Þar sem mikið var um apa í nágrenni þorpsins, fóru þorpsbúar að veiða apana og selja manninum þá.

Maðurinn keypti þúsundir apa af þorpsbúum á 1000 krónur, en þegar framboðið fór að minnka, bauðst maðurinn til að borga 2000 krónur fyrir apann. Aftur jókst framboðið um tíma, en síðan minnkaði það enn frekar og hætti loks alveg, þar sem erfiðara var fyrir þorpsbúa að finna fleiri apa til að selja. Þá tilkynnti maðurinn að hann myndi borga 5000 krónur fyrir hvern apa sem hann fengi, en hann þyrfti aðeins að skreppa frá og aðstoðarmaður hans myndi sjá um kaupin á meðan.

Eftir að maðurinn var farinn, hóaði aðstoðarmaðurinn þorpsbúum saman og bauðst til að selja apana sem geymdir voru í búrum, á 3500 krónur stykkið. Fólkið gæti svo þegar maðurinn kæmi aftur selt honum apana á 5000 krónur. Þorpsbúar söfnuðu því saman öllu sínu sparifé og keyptu apana af aðstoðarmanninum.

Síðan hefur ekkert spurst, hvorki til mannsins né aðstoðarmannsins.

-Og núna veistu allt um hvernig hlutabréfamarkaðurinn virkar!

Kv.Ág.

Afmæliskveðjur

2008-02-11T10:21:00.000Z

Elsti bróðir minn hann Kristinn Viðar átti afmæli í gær og mágkona mín hún Olga á afmæli í dag. Viljum við óska ykkur báðum innilega til hamingju með daginn. Kv. Ág.

Öskudagurinn í leikskólanum

2008-02-09T21:39:00.000Z

María að reyna að slá köttinn úr tunnunni

Svavar með félögunum

María með Emelí bestu vinkonu sinni

Svavar með Berglindi vinkonu sinni og fleirum

Lífið á Gauksstöðum undanfarnar vikur

2008-02-09T15:06:00.000Z

Jæja nú held ég sé kominn tími til að láta aðeins vita af okkur. Við erum bara nokkuð hress flestöll en Svavar og María eru búin að vera með kvef í vikunni og smá kommu lumbru í gær og í morgun. Annars erum við búin að vera bara nokkuð hress síðan um áramót.

Janúar kom okkur nú á óvart í hönnuninni en við vorum búin að búa okkur undir það að hafa lítið að gera svona í byrjun árs, allavega fyrstu tvær vikunnar. Raunin varð önnur og janúar er búinn að vera mjög góður en febrúar aðeins slakari sem líka má rekja til þess að við höfum ekki sinnt hönnuninni nógu vel síðustu eina og hálfa vikuna þar sem við erum búin að vera á fullu við að standsetja vinnustofuna okkar hérna úti í „fjósi“. Pabbi sem sagt kom til okkar aftur núna fyrir um tveimur vikum og er búinn að vera að hjálpa okkur þessar vikur. Þetta hefur gengið bara vel og fer að líða að því að við getum farið að bjóða fólki þar inn. Það er nefnilega stefnt að því að opna smá gallerí hérna hjá okkur þar sem hægt verður að sjá hvað við erum að gera bæði í hönnuninni, minjagripunum, gjafavörunum og einnig í myndlistinni. Þetta á eftir að verða spennandi viðbót :-).

Við erum búin að vera að undirbúa árið fyrir Lyng og er að styttast í það að töluvert fleiri vörur komi á markað hjá okkur. Það er semsagt afrakstur þróunarvinnunnar á síðasta ári sem var heilmikil. Annars kemur salan ekki til með að fara af stað aftur í minjagripunum fyrr en um páskana í fyrsta lagi og þá er líka eins gott að vera tilbúin með lager og nú er líka verið að fara af stað í að framleiða inn á lagerinn fyrir sumarið.

Svavar og María hafa haft það fínt í leikskólanum, Svavar hefur meira að segja verið tregur á köflum að koma strax með okkur heim þegar við sækjum þau krakkana um klukkan fjögur á daginn. Það var haldin gleðivika í janúar, þar sem m.a. leikskólakennararnir voru allir með furðuhatta einn daginn þegar við mættum í skólann einnig sem vikan endaði á náttfatadegi og mættu þá bæði starfsmenn og börnin í náttfötum í skólann… það var frekar skrítið að vakna, klæða sig úr náttfötunum og fara svo í önnur náttföt… þetta fannst Svavari frekar fyndið. Svo var auðvitað haldið upp á bóndadaginn og borðaður þorramatur þegar Þorrinn gekk í garð, á bolludaginn borðuðu krakkarnir bollurnar sem þau bökuðu sjálf, sprengidagurinn var eins og annarsstaðar borðað var saltkjöt og baunir og svo var hápunkturinn í vikunni var efalaust öskudagurinn. Svavar og María fóru í búningunum sem þau fengu í jólagjöf frá frænku sinni, Kristlaugu og Hjölla. Svavar var í Cars-kappakstursbúningi og María var blómálfur. Það var haldið ball í skólanum og kötturinn sleginn úr tunnunni.

Það sem af er ári hefur fjölskyldan verið mjög heimakær og lítið félagslíf verið stundað… við erum einhvernveginn alltaf sjálfum okkur nóg. Þó er það eiginlega skemmtilegasta sem við gerum er að fá góða vini í heimsókn eða að sækja aðra heim… maður þarf bara að drífa í því… svo eru auðvitað allir svo uppteknir eitthvað. Birna og Hera eru búnar að koma alveg hálfsmánaðarlega til okkar undan farrið og hefur það verið einkar ánægjulegt þar sem í fyrra leið frekar langt á milli að þær kæmu til okkar. Þóarinn bróðir er búinn að koma allavega þrisvar síðan um áramót (geri aðrir betur :-)). Í eitt skiptið buðum við honum, Olgu og Kristínu í þorramat og saltfisk. Þetta var mjög skemmtilegt kvöld og gaman fyrir hann föður minn að geta hitt þau líka. Ef veðrið hefði ekki átt að fara að versna þarna um kvöldið hefðu þau sennilega gist líka. Svavar, María og Kristín eru ferlega góð að leika sér gaman og eins og áður þá segir María alltaf þegar Kristínu ber á góma: „Ég elska Kristínu“… hún er náttúrulega svo mikið krútt hún María þegar hún segir þetta :-).

Eins og kom fram í síðustu færslu hjá Ara þá voru læðurnar að breima og hugsanlega tókst að para Golíat og Sólbjörtu en það er ekki komið í ljós ennþá. Við erum að vísu undanfarna daga búin að vera með hjartað í buxunum yfir Golíati en hann fór hérna út fyrir rúmri viku síðan og hefur ekki látið sjá sig fyrr en í morgun… mikið vorum við fegin að sjá hann og hann feginn að sjá okkur. Allavegana er ég búin að fá nokkur knús frá honum. Við vorum farin að halda að við sæjum hann kannski ekki aftur… meira flakkið á honum karlinum :-(.

Síðan er það auðvitað veðrið undanfarið, er nokkuð annars hægt að sleppa því að ræða veðrið eins og sannur íslendingur. Það hefur gengið á ýmsu hérna og eins og pabbi og Ari voru bara að tala um í morgun þá er veðrið svolítið klofið á geði því aðra stundina eins og í dag skin sólin þannig að varla er hægt að vera hérna í stofunni hjá okkur (það vantar nefnilega gardínur ennþá) og hina stundina gengur á með svo dimmum éljum að varla sést í næsta hús. Í einu veðrinu (af mörgum) gekk aldan hérna vel upp á varnargarðinn og vindurinn feykti henni hingað á gluggana, hurðin af hjallinum fauk ásamt sjónvarpsloftnetinu og endurvinnslutunnunni, sem fannst reyndar hérna úti á túni. Einnig beyglaðist járnplata á hjallinum en fauk ekki. Í nótt svignaði álkanntur á þakkantinum á Gauksstöðum og það losnaði eitthvað kítti við gluggann í garðskálanum sem síðan slóst alltaf til í vindinum. Þetta var orðin rúmlega eins meters svipa má segja sem barði á glugganum og hélt eitthvað vöku fyrir pabba í nótt sem svaf í næsta herbergi við garðskálann. Annars finnst mér snjórinn undanfarið hafa verið bara heimilislegur og notalegur þó svo hann geti náð sér ansi mikið upp hérna snjóbylurinn þá er bara notalegt þegar hægt er að vera bara innandyra. Pabbi hefur tildæmis ekki setið hérna inni og notið þess að hlusta á útvarpið eða tónlist eða eitthvað þessháttar heldur hefur hann setið í stólnum og notið þess að hlusta á veðrið :-). Mér líkar aftur á móti ekki mjög við umhleypingar með rigningu og roki eins og var hérna í gær (Arghh!) Þá vil ég frekar snjó og stillu. Ég held þetta tengist því að ég er alin upp við snjóinn og finnst hann fyrir vikið eitthvað svo heimilislegur þó öðrum hérna líki hann ekki.

Nú er þetta orðin alltof löng færsla og ætla ég að láta þetta nægja núna. Sæl að sinni… Kv.Ág.

Mjjjaaaaááááá

2008-01-23T21:22:00.000Z

Nú er kattarkórinn að syngja hið vinsæla lag: Ég er breima og til í tuskið.
Sólbjört er breima og til að bæta gráu oná svart þá byrjaði nornakötturinn líka að syngja.
Síðan í fyrrakvöld þá heyrum við, að við héldum, barnsgrát við útidyrnar. Mjög óhuggnalegt.
Ekki var það barn heldur Golíat og einhver fresspungur að mæla hvern annan út. Þvílík óhljóð.
Myndin er af Sólbjörtu tekin með nýju linsunni; Canon EF 85mm f/1.8 USM.

VARÚÐ: Risk

2008-01-18T14:13:00.000Z

Eins og sjá má hér að neðan var spilað Risk hér um jólin. Þegar Risk er spilað verður maður að vera meðvitaður um að fjölskyldulífið getur verið í uppnámi í töluverðan tíma því eins og gamla máltækið segir þá er engin annars bróðir í leik.

Myndablogg: TEKIÐ Í SPIL UM ÁRAMÓT

2008-01-18T13:57:00.000Z

Myndablogg: SYSTURNAR

2008-01-18T13:44:00.001Z

Nornakötturinn Nótt

2008-01-13T23:11:00.000Z

Við sólarupprás kl 11 í morgun

2008-01-12T11:27:00.000Z

Sólarupprás var um klukkan 11 í morgun og notaði ég þá tækifærið og tók þessar myndir. Þegar við vöknuðum í morgun var smá snjór á Gauksstaðavegi og þar sem undirlag er mjög slétt. Þetta var mjög lítill snjór. Klukkan 11 í morgun var á Garðskagavita hæg austanátt eða 3.8 m/sek og hiti tæpar 3°C. Nú er orðið bjart og fallegt veður en sjá má þó stöku sinnum snjókorn falla til jarðar og er varla hægt að tala um snjókomu eða éljagang. Eigið góðan dag :-). Kv.Ág.

Afmæliskveðja frá Íslandi

2008-01-11T22:56:00.000Z

Bróðursonur minn, hann Einar Mar er 7 ára í dag. Elsku Einar Mar til hamingju með afmælið, það hefði nú verið gaman fyrir okkur öll að geta komið í afmælið þitt en það er bara svolítið langt frá Íslandi til Oslóar í Noregi. Vonandi sjáumst við samt eitthvað á þessu ári. Takk fyrir skemmtilegan tíma í sumar þegar þið komuð upp á klakann, Svavar og María tala stundum um ykkur og ég veit að þeim langar að heimsækja ykkur :-). Afmæliskveðjur frá okkur öllum á Gauksstöðum. Kv.Ág.

Jólin tekin niður

2008-01-09T23:06:00.000Z

Nú er enn eitt árið liðið hjá fjölskyldunni sem býr á Gauksstöðum í Garði. Árin líða orðið býsna hratt hjá og eldri stelpurnar okkar sem voru fyrir skömmu síðan lítil börn eru nú vandaðar ungar konur. Jólin voru góð, við fengum langþráða hvíld og gátum hlaðið aðeins batteríin eftir erfitt ár. Árið sem er nýbyrjað fer á stað með látum og erum við búin að vera á haus frá áramótum, fínt start það. Annars leggst nýja árið vel í okkur. Þetta er árið sem við uppskerum, við trúum því enda spurðum við rúnirnar að því og þær eru jákvæðar. Reyndar kom upp rún hjá okkur báðum sem við bjuggumst satt að segja ekki við, en svona er þetta, hvað vitum við? Núna í dag var jólatréið tekið niður og sett út með dálitlum söknuði, sérstaklega fyrir þau litlu. Áður en við tókum af því skrautið og ljósin þá kvöddum við tréið og þökkuðum því fyrir að gleðja okkur með því að standa í stofunni okkar. Við höfum aldrei gert þetta áður og þetta var góð tilfinning.

Gleðilegt nýtt ár!

2007-12-31T13:45:00.000Z

Áramótakveðja frá Gauksstöðum. Við færum ykkur kæru vinir, fjölskylda og aðrir lesendur óskir um gleðilegt nýtt ár með þökk fyrir liðnar samverustundir og vonandi verða samverustundirnar fleiri á nýju ári. Eigið góð en örugg áramót :-). Kveðja, Ágústa, Ari, Svavar Axel, María Elísa, Birna, Hera og dýrin í dýra-Garðinum okkar.